saavan ke mahiine firdaus banaae hue saavan ke mahiine

Firdaus banaa.e hue saavan ke maheene Ik gul-rukh o nasreen-badan o sarv-e-sahee ne Maathe pe idhar kaakul-e-zholeeda kee lahren Gardoon pe udhar abr-e-khiraamaan ke safeene Menh jitnaa barastaa tha sar-e-daaman-e-kohsaar Itne hee zameen apnee ugaltee thee dafeene Allaah-re ye farmaan ki is mast havaa men Ham munh se na bolenge agar pee na kisee ne Vo moonis-o-gham-khvaar tha jis ke liye barson Maangee thiin duaa.en mire aaghosh-e-tahee ne Gul-rez the saahil ke lachakte hue paude Gul-rang the taalaab ke tarshe hue ziine Baarish thee lagaataar to yuun gard thee mafqood Jis tarah mai-e-naab se dhul jaate hain siine Dam bhar ko bhee thamtee thiin agar sard havaa.en Aate the javaanee ko paseene pe paseene Bhar dee thee chaTaanon men bhee ghunchon kee see narmee Ik fitna-e-kaunain kee naazuk-badanee ne Getee se ubalte the tamannaa ke saleeqe Gardoon se baraste the mohabbat ke qareene Kyaa dil kee tamannaaon ko marboot kiyaa tha Sabze pe chamaktee huee saavan kee jhaDee ne Badlee thee falak par ki junoon-khez javaanee Boonden thiin zameen par ki angooThee ke nageene Shaakhon pe parinde the jhaTakte hue shahpar Nahron men baten apne ubhaare hue siine Is fasl men is darja raha be-khud o sarshaar Maikhaane se baahar mujhe dekhaa na kisee ne Kyaa lamha-e-faanee tha ki muD kar bhee na dekhaa Dee kitnee hee awaaz hayaat-e-abadee ne Firdaus banae hue sawan ke mahine Ek gul-ruKH o nasrin-badan o sarw-e-sahi ne Mathe pe idhar kakul-e-zholida ki lahren Gardun pe udhar abr-e-KHiraman ke safine Meinh jitna barasta tha sar-e-daman-e-kohsar Itne hi zamin apni ugalti thi dafine Allah-re ye farman ki is mast hawa mein Hum munh se na bolenge agar pi na kisi ne Wo munis-o-gham-KHwar tha jis ke liye barson Mangi thin duaen mere aaghosh-e-tahi ne Gul-rez the sahil ke lachakte hue paude Gul-rang the talab ke tarshe hue zine Barish thi lagatar to yun gard thi mafqud Jis tarah mai-e-nab se dhul jate hain sine Dam bhar ko bhi thamti thin agar sard hawaen Aate the jawani ko pasine pe pasine Bhar di thi chaTanon mein bhi ghunchon ki si narmi Ek fitna-e-kaunain ki nazuk-badani ne Geti se ubalte the tamanna ke saliqe Gardun se baraste the mohabbat ke qarine Kya dil ki tamannaon ko marbut kiya tha Sabze pe chamakti hui sawan ki jhaDi ne Badli thi falak par ki junun-KHez jawani Bunden thin zamin par ki anguThi ke nagine ShaKHon pe parinde the jhaTakte hue shahpar Nahron mein baten apne ubhaare hue sine Is fasl mein is darja raha be-KHud o sarshaar MaiKHane se bahar mujhe dekha na kisi ne Kya lamha-e-fani tha ki muD kar bhi na dekha Di kitni hi aawaz hayat-e-abadi ne