sarshaar hoon sarshaar hai Dunya mire aage
— Josh Malihabadi
Sarshaar hoon sarshaar hai Dunya mire aage
Kaunain hai ik larzish-e-sahbaa mire aage
Har najm hai ik aariz-e-raushan mire nazdeek
Har zarra hai ik deeda-e-beenaa mire aage
Har jaam hai nazzaara-e-kausar mire haq men
Har gaam hai gulgasht-e-musallaa mire aage
Har phuul hai laal-e-shakar-afshaan kee hikaayat
Har ghuncha hai ik harf-e-tamannaa mire aage
Ik maz.haka hai pursish-e-uqbaa mire nazdeek
Ik vahm hai andesha-e-fardaa mire aage
Hon kitnee hee taareek shab-e-zeest kee raahen
Ik nuur saa rahtaa hai jhalaktaa mire aage
Main aur Daroon saulat-e-Dunya-e-danee se
Khud larza-bar-andaam hai Dunya mire aage
Jhuktaa hai ba-sad ijz kaleesaa mire dar par
Aataa hai laraztaa huaa kaaba mire aage
Paimaane se jis vaqt chhalak jaatee hai sahbaa
Lahraataa hai ik husn kaa Dariya mire aage
Jab chaand jhamaktaa hai mire saaghar-e-zar men
Chaltaa naheen khursheed kaa daavaa mire aage
Jab jhuum ke miinaa ko uThaataa hoon ghaTaa men
Hiltaa hai sar-e-gumbad-e-meenaa mire aage
Aatee hai dulhan ban ke mashiyyat kee jilau men
Aavaargri-e-aadam-o-havvaa mire aage
Paimaane pe jis vaqt jhukaataa hoon suraahee
Jhuktaa hai sar-e-aalam-e-baalaa mire aage
Pahloo men hai ik zohra-jabeen haath men saaghar
Is vaqt na Dunya hai na uqbaa mire aage
'josh' uThtee hai dushman kee nazar jab miree jaanib
Khultaa hai mohabbat kaa dareechaa mire aage