sayyaad daam e zulf se mujh ko rihaa kare

Sayyaad daam-e-zulf se mujh ko rihaa kare Wo din tamaam umr na aa.e khuda kare Le de ke rah gaya hai yahee ek aasraa Aisa kabhi na ho ki wo tark-e-wafa kare Mujh be-navaa ke naaz uThaa.e wo naazneen Sultaan aur kaavish-e-qurb-e-gadaa kare Daamaan-e-boo-e-kaakul-e-shab rang chhoD de Yaa rab kabhi ye zulm na baad-e-sabaa kare Jis ke maraz pe sehat-e-aalam nisaar ho Kis tarah wo mareez duaa-e-shifaa kare But jis pe multafit ho ba-hadd-e-supurdagee Zindeeq hai agar wo khuda se duaa kare Umr-e-daraaz o pukhtagi-e-fikr-e-nukta-sanj Kahtee hai khaam kaam mujhe haan kahaa kare Us roo-e-dil-nasheen pe nigaahen jamee raheen Fariyaad kar rahee hai baseerat ki kya kare Ab daam-e-husn-o-ishq se nikloon na taa-ba marg Ghar jal raha hai aql-e-rasaa kaa jalaa kare Hikmat namak-haraam hoon be-shak tiraa magar Jis par paDe ye vaqt wo bechaaraa kya kare Yaa rab hisaar-e-najd se ab uTh sake na 'josh' Yoonaan de raha hai duhaa.ee diyaa kare