shikast e zindaan kaa khvaab kya hind kaa zindaan kaanp raha hai guunj rahii hain takbiiren

Kya hind kaa zindaan kaanp raha hai guunj rahi hain takbeeren Uktaa.e hain shaayad kuch qaidee aur tod rahe hain zanjeeren Deevaaron ke neeche aa aa kar yuun jam.a hue hain zindaanee Seenon men talaatum bijlee kaa aankhon men jhalaktee shamsheeren Bhookon kee nazar men bijlee hai topon ke dahaane ThanDe hain Taqdeer ke lab ko jumbish hai dam tod rahi hain tadbeeren Aankhon men gadaa kee surkhee hai be-noor hai chehra sultaan kaa Takhreeb ne parcham kholaa hai sajde men paDee hain taameeren Kyaa un ko khabar thee zer-o-zabar rakhte the jo rooh-e-millat ko Ublenge zameen se maar-e-siyah barsengee falak se shamsheeren Kyaa un ko khabar thee seenon se jo Khoon churaayaa karte the Ik roz isee be-rangee se jhalkengee hazaaron tasveeren Kyaa un ko khabar thee honTon par jo qufl lagaayaa karte the Ik roz isee khaamoshee se Tapkengee dahaktee taqreeren Sambhlo ki wo zindaan guunj uThaa jhapTo ki wo qaidee chhooT ga.e UTTho ki wo baiTheen deevaaren dauDo ki wo TuuTee zanjeeren Kya hind ka zindan kanp raha hai gunj rahi hain takbiren Uktae hain shayad kuch qaidi aur tod rahe hain zanjiren Diwaron ke niche aa aa kar yun jama hue hain zindani Sinon mein talatum bijli ka aankhon mein jhalakti shamshiren Bhukon ki nazar mein bijli hai topon ke dahane ThanDe hain Taqdir ke lab ko jumbish hai dam tod rahi hain tadbiren Aankhon mein gada ki surKHi hai be-nur hai chehra sultan ka TaKHrib ne parcham khola hai sajde mein paDi hain tamiren Kya un ko KHabar thi zer-o-zabar rakhte the jo ruh-e-millat ko Ublenge zamin se mar-e-siyah barsengi falak se shamshiren Kya un ko KHabar thi sinon se jo KHun churaya karte the Ek roz isi be-rangi se jhalkengi hazaron taswiren Kya un ko KHabar thi honTon par jo qufl lagaya karte the Ek roz isi KHamoshi se Tapkengi dahakti taqriren Sambhlo ki wo zindan gunj uTha jhapTo ki wo qaidi chhuT gae UTTho ki wo baiThin diwaren dauDo ki wo TuTi zanjiren