tajrabe ke dasht se dil ko guzarne ke liye
— Josh Malihabadi
Tajrabe ke dasht se dil ko guzarne ke liye
Roz ik soorat na.ee hai ghaur karne ke liye
Jab koee bantaa hai laakhon hastiyon ko meT kar
Sub.h taaron ko dabaatee hai ubharne ke liye
Haamil-e-asraar-e-fitrat hoon gadaa bhee hoon to kya
Baat ye kaafee hai mujh ko fakhr karne ke liye
Ruuh ko chamkaa khudee ko toD kar ziine banaa
Do ye tadbeeren hain Dunya men ubharne ke liye
Ghaur se dekhaa nizaam-e-dahr to saabit huaa
Aadmee paidaa huaa hai kaam karne ke liye
Sub.h uTh kar aansuon se Khoon ke rotaa hoon main
Dil ke naqshe men wafa kaa rang bharne ke liye
Gauhar-e-maqsood khud miltaa hai himmat shart hai
Muztarib rahtaa hai har motee ubharne ke liye
Aankh sharmaa.ee huee hai baal peshaanee pe hain
Aa.eena-khaane men jaate hain sanvarne ke liye
Kah do Dunya ke havaadis se na chheDen is tarah
'josh' ham tayyaar hee baiThe hain marne ke liye