zaiifa

Ik za.eefa raaste men so rahi hai khaak par Murdanee chhaa.ee huee hai chehra-e-ghamnaak par Aur kis mausam men jab taa.oon hai phailaa huaa Zarra zarra hai vabaa ke khauf se simTaa huaa Raat aadhee aa chukee hai baam-o-dar khaamosh hain Ahl-e-daulat laila-e-ishrat se ham-aaghosh hain Is qayaamat kee hai taaree zulmat-e-haul-aafreen Shab ke dil men sub.h kaa goyaa tasavvur tak nahin Peechhe peechhe aa raha hai kaun ye kya baat hai Baj rahe hain kaan uff kaisee bhayaanak raat hai Halqa-e-zulmat men hai raahon kee sahmee raushnee Yaa chamaktee hain ghanee jhaaDee se aankhen sher kee Larza-bar-andaam hai sehn-e-zameen kaa arz-o-tool Ho raha hai khaak par naapaak roohon kaa nuzool Aa rahi hain aasmaan se ye sadaa.en dam-ba-dam Dekh asbaab-e-halaakat par na paD jaa.e qadam Baam-o-dar par maut kaa parcham hai lahraayaa huaa Aa rahi hai har qadam par boo-e-anfaas-e-vabaa RaungTe saare khaDe hain saans lenaa hai vabaal Al-amaan shor-e-sagaan-e-raah o ghoghaa-e-shaghaal Uf laraztee khaufnaak awaaz chaukeedaar kee Nabz chhooTee jaa rahi hai gumbad-e-davvaar kee Chupke chupke saans lene se ghuTaa jaataa hai dam Rakh raha hoon bolte zarron pe ruk ruk kar qadam Ibrat o dahshat kaa khanjar hai dil-e-ghamnaak par Haa.e ye be-dam paDaa hai kaun ThanDee khaak par Aah ai be-kas za.eefa gham kee taDpaa.ee huee Ai zamaane kee jhinjhoDee zar kee Thukraa.ee huee Mere dil ke aa.ine ko kar raha hai chuur chuur Tere sar par rahguzar kee sham.a kaa halkaa saa nuur Ye tire sar kee safedee aur ye gard-e-malaal Men to kya sharmaa raha hai khud khuda-e-zul-jalaal Bhuuk ke lashkar kaa hai rukh par tire gard-o-ghubaar Ahd-e-razzaaqee ke maathe par araq hai aashkaar Tere bachche tere gardoon ke sitaare kya hue Ai za.eefa teree piiree ke sahaare kya hue Aah ai dukhiyaa ye kaisee paa.emaalee ho ga.ee Thokaren khaane ko teree god khaalee ho ga.ee So raha hai teraa vaaris kis taraf pahne kafan Dafn hai kis des men teraa uroosee baankpan Bazm-e-ishrat men dulhan kis ne banaayaa tha tujhe Byaah kar kaun apne ghar men aah laayaa tha tujhe Khuun rukh par dauDtaa hogaa tiree awaaz se Tujh ko paalaa hogaa teree maan ne kis kis naaz se Daaltee hogee tujhe nahlaa-dhulaa kar sar men tel Baap kaa dil kheenchtaa hogaa tiree guDiyon kaa khel Paas kee taaseer kyuun chehre pe duunee ho ga.ee Maa.ikaa veeraan huaa sasuraal suunee ho ga.ee Chaahne vaale tire sab turbaton men so ga.e Kheltee thee jin ghane baaghon men wo kya ho ga.e Uf-ree maayoosee kisee kaa aasraa rakhtee nahin Shubah hota hai ki too shaayad khuda rakhtee nahin Too kahaan kee rehne vaalee hai tiraa kya naam hai Bol too kis dil-nasheen aaghaaz kaa anjaam hai Hind men insaaniyat kaa daur hee baaqee nahin Dard ho kis tarah koi mard hee baaqee nahin Mard hee hote to karte bekason kaa ehtiraam Mard hee hote to rah sakte the yuun ban kar ghulaam Khidmat-e-aghyaar se fursat koi paataa nahin Sach hai apnon par ghulaamon ko taras aataa nahin Ai za.eefa nang hai too mulk-o-millat ke liye Too hai ik dhabbaa jabeen-e-ahl-e-daulat ke liye Ik khulee zillat hai adyaan-o-milal ke vaaste Tauq hai la.anat kaa too ahl-e-duval ke vaaste To va.eed-e-qahr hai arbaab-e-ishrat ke liye Bars kaa ik daagh hai roo-e-hukoomat ke liye Mujh ko hairat hai ki tujh ko dekh kar zaar-o-nizaar GaD nahin jaate hayaa se haakimaan-e-zee-vaqaar Dekh kar teraa Dhalaa mankaa nahin hota hai chuur Gardanon ke kham ko sakhtee bakhshne vaalaa ghuroor PaD nahin jaate ilaahee seena-e-daulat men daagh Bujh nahin jaate shabistaan-e-imaarat ke charaagh Apnee taab-e-zar se ai sarmaaya-daaro! hoshiyaar Apne taajon kee chamak se taaj-daaro hoshiyaar Neelam-o-yaaqoot se shole bhaDak uThne ko hain Surkh deenaaron men angaare dahak uThne ko hain Farsh-e-gul vaalo zameen par log mahv-e-khvaab hain Khirmanon ke paasbaanon bijliyaan betaab hain!! Ek zaifa raste mein so rahi hai KHak par Murdani chhai hui hai chehra-e-ghamnak par Aur kis mausam mein jab taun hai phaila hua Zarra zarra hai waba ke KHauf se simTa hua Raat aadhi aa chuki hai baam-o-dar KHamosh hain Ahl-e-daulat laila-e-ishrat se ham-aghosh hain Is qayamat ki hai tari zulmat-e-haul-afrin Shab ke dil mein subh ka goya tasawwur tak nahin Pichhe pichhe aa raha hai kaun ye kya baat hai Baj rahe hain kan uff kaisi bhayanak raat hai Halqa-e-zulmat mein hai rahon ki sahmi raushni Ya chamakti hain ghani jhaDi se aankhen sher ki Larza-bar-andam hai sehn-e-zamin ka arz-o-tul Ho raha hai KHak par napak ruhon ka nuzul Aa rahi hain aasman se ye sadaen dam-ba-dam Dekh asbab-e-halakat par na paD jae qadam Baam-o-dar par maut ka parcham hai lahraya hua Aa rahi hai har qadam par bu-e-anfas-e-waba RaungTe sare khaDe hain sans lena hai wabaal Al-aman shor-e-sagan-e-rah o ghogha-e-shaghaal Uf larazti KHaufnak aawaz chaukidar ki Nabz chhuTi ja rahi hai gumbad-e-dawwar ki Chupke chupke sans lene se ghuTa jata hai dam Rakh raha hun bolte zarron pe ruk ruk kar qadam Ibrat o dahshat ka KHanjar hai dil-e-ghamnak par Hae ye be-dam paDa hai kaun ThanDi KHak par Aah ai be-kas zaifa gham ki taDpai hui Ai zamane ki jhinjhoDi zar ki Thukrai hui Mere dil ke aaine ko kar raha hai chur chur Tere sar par rahguzar ki shama ka halka sa nur Ye tere sar ki safedi aur ye gard-e-malal Mein to kya sharma raha hai KHud KHuda-e-zul-jalal Bhuk ke lashkar ka hai ruKH par tere gard-o-ghubar Ahd-e-razzaqi ke mathe par araq hai aashkar Tere bachche tere gardun ke sitare kya hue Ai zaifa teri piri ke sahaare kya hue Aah ai dukhiya ye kaisi paemali ho gai Thokaren khane ko teri god KHali ho gai So raha hai tera waris kis taraf pahne kafan Dafn hai kis des mein tera urusi bankpan Bazm-e-ishrat mein dulhan kis ne banaya tha tujhe Byah kar kaun apne ghar mein aah laya tha tujhe KHun ruKH par dauDta hoga teri aawaz se Tujh ko pala hoga teri man ne kis kis naz se Dalti hogi tujhe nahla-dhula kar sar mein tel Bap ka dil khinchta hoga teri guDiyon ka khel Pas ki tasir kyun chehre pe duni ho gai Maika viran hua sasural suni ho gai Chahne wale tere sab turbaton mein so gae Khelti thi jin ghane baghon mein wo kya ho gae Uf-ri mayusi kisi ka aasra rakhti nahin Shubah hota hai ki tu shayad KHuda rakhti nahin Tu kahan ki rehne wali hai tera kya nam hai Bol tu kis dil-nashin aaghaz ka anjam hai Hind mein insaniyat ka daur hi baqi nahin Dard ho kis tarah koi mard hi baqi nahin Mard hi hote to karte bekason ka ehtiram Mard hi hote to rah sakte the yun ban kar ghulam KHidmat-e-aghyar se fursat koi pata nahin Sach hai apnon par ghulamon ko taras aata nahin Ai zaifa nang hai tu mulk-o-millat ke liye Tu hai ek dhabba jabin-e-ahl-e-daulat ke liye Ek khuli zillat hai adyan-o-milal ke waste Tauq hai lanat ka tu ahl-e-duwal ke waste To waid-e-qahr hai arbab-e-ishrat ke liye Bars ka ek dagh hai ru-e-hukumat ke liye Mujh ko hairat hai ki tujh ko dekh kar zar-o-nizar GaD nahin jate haya se hakiman-e-zi-waqar Dekh kar tera Dhala manka nahin hota hai chur Gardanon ke KHam ko saKHti baKHshne wala ghurur PaD nahin jate ilahi sina-e-daulat mein dagh Bujh nahin jate shabistan-e-imarat ke charagh Apni tab-e-zar se ai sarmaya-daro! hoshiyar Apne tajon ki chamak se taj-daro hoshiyar Nilam-o-yaqut se shole bhaDak uThne ko hain SurKH dinaron mein angare dahak uThne ko hain Farsh-e-gul walo zamin par log mahw-e-KHwab hain KHirmanon ke pasbanon bijliyan betab hain!!