aurat uth mirii jaan mire saath hi chalnaa hai tujhe

UTh miree jaan mire saath hee chalnaa hai tujhe Qalb-e-maahaul men larzaan sharar-e-jang hain aaj Hausle waqt ke aur ziist ke yak-rang hain aaj Aabgeenon men tapaan valvala-e-sang hain aaj Husn aur ishq ham-awaaz o ham-aahang hain aaj Jis men jaltaa hoon usee aag men jalnaa hai tujhe UTh miree jaan mire saath hee chalnaa hai tujhe Tere qadmon men hai firdaus-e-tamaddun kee bahaar Teree nazron pe hai tahzeeb o taraqqee kaa madaar Teree aaghosh hai gahvaara-e-nafs-o-kirdaar Taa-ba-kai gird tire vahm o ta.ayyun kaa hisaar Kaund kar majlis-e-khalvat se nikalnaa hai tujhe UTh miree jaan mire saath hee chalnaa hai tujhe Too ki be-jaan khilaunon se bahal jaatee hai Taptee saanson kee haraarat se pighal jaatee hai Paanv jis raah men rakhtee hai phisal jaatee hai Ban ke seemaab har ik zarf men Dhal jaatee hai Ziist ke aahanee saanche men bhee Dhalnaa hai tujhe UTh miree jaan mire saath hee chalnaa hai tujhe Zindagee jehd men hai sabr ke qaaboo men nahin Nabz-e-hastee kaa lahoo kaanpte aansoo men nahin UDne khulne men hai nik.hat kham-e-gesoo men nahin Jannat ik aur hai jo mard ke pahloo men nahin Us kee aazaad ravish par bhee machalnaa hai tujhe UTh miree jaan mire saath hee chalnaa hai tujhe Goshe goshe men sulagtee hai chitaa tere liye Farz kaa bhes badaltee hai qazaa tere liye Qahr hai teree har ik narm adaa tere liye Zahr hee zahr hai dunya kee havaa tere liye Rut badal Daal agar phoolnaa phalnaa hai tujhe UTh miree jaan mire saath hee chalnaa hai tujhe Qadr ab tak tiree taareekh ne jaanee hee nahin Tujh men sho.ale bhee hain bas ashk-fishaanee hee nahin Too haqeeqat bhee hai dilchasp kahaanee hee nahin Teree hastee bhee hai ik chiiz javaanee hee nahin Apnee taareekh kaa unvaan badalnaa hai tujhe UTh miree jaan mire saath hee chalnaa hai tujhe ToD kar rasm kaa but band-e-qadaamat se nikal Zof-e-ishrat se nikal vahm-e-nazaakat se nikal Nafs ke kheenche hue halqa-e-azmat se nikal Qaid ban jaa.e mohabbat to mohabbat se nikal Raah kaa khaar hee kya gul bhee kuchalnaa hai tujhe UTh miree jaan mire saath hee chalnaa hai tujhe ToD ye azm-shikan daghdagha-e-pand bhee tod Teree khaatir hai jo zanjeer wo saugand bhee tod Tauq ye bhee hai zamurrad kaa guloo-band bhee tod ToD paimaana-e-mardaan-e-khirad-mand bhee tod Ban ke toofaan chhalaknaa hai ubalnaa hai tujhe UTh miree jaan mire saath hee chalnaa hai tujhe Too falaatoon o arastoo hai too zahraa parveen Tere qabze men hai gardoon tiree Thokar men zameen Haan uThaa jald uThaa paa-e-muqaddar se jabeen Main bhee rukne kaa nahin waqt bhee rukne kaa nahin LaDkhaDaa.egee kahaan tak ki sambhalnaa hai tujhe UTh miree jaan mire saath hee chalnaa hai tujhe UTh meri jaan mere sath hi chalna hai tujhe Qalb-e-mahaul mein larzan sharar-e-jang hain aaj Hausle waqt ke aur zist ke yak-rang hain aaj Aabginon mein tapan walwala-e-sang hain aaj Husn aur ishq ham-awaz o ham-ahang hain aaj Jis mein jalta hun usi aag mein jalna hai tujhe UTh meri jaan mere sath hi chalna hai tujhe Tere qadmon mein hai firdaus-e-tamaddun ki bahaar Teri nazron pe hai tahzib o taraqqi ka madar Teri aaghosh hai gahwara-e-nafs-o-kirdar Ta-ba-kai gird tere wahm o tayyun ka hisar Kaund kar majlis-e-KHalwat se nikalna hai tujhe UTh meri jaan mere sath hi chalna hai tujhe Tu ki be-jaan khilaunon se bahal jati hai Tapti sanson ki hararat se pighal jati hai Panw jis rah mein rakhti hai phisal jati hai Ban ke simab har ek zarf mein Dhal jati hai Zist ke aahani sanche mein bhi Dhalna hai tujhe UTh meri jaan mere sath hi chalna hai tujhe Zindagi jehd mein hai sabr ke qabu mein nahin Nabz-e-hasti ka lahu kanpte aansu mein nahin UDne khulne mein hai nikhat KHam-e-gesu mein nahin Jannat ek aur hai jo mard ke pahlu mein nahin Us ki aazad rawish par bhi machalna hai tujhe UTh meri jaan mere sath hi chalna hai tujhe Goshe goshe mein sulagti hai chita tere liye Farz ka bhes badalti hai qaza tere liye Qahr hai teri har ek narm ada tere liye Zahr hi zahr hai duniya ki hawa tere liye Rut badal Dal agar phulna phalna hai tujhe UTh meri jaan mere sath hi chalna hai tujhe Qadr ab tak teri tariKH ne jaani hi nahin Tujh mein shoale bhi hain bas ashk-fishani hi nahin Tu haqiqat bhi hai dilchasp kahani hi nahin Teri hasti bhi hai ek chiz jawani hi nahin Apni tariKH ka unwan badalna hai tujhe UTh meri jaan mere sath hi chalna hai tujhe ToD kar rasm ka but band-e-qadamat se nikal Zof-e-ishrat se nikal wahm-e-nazakat se nikal Nafs ke khinche hue halqa-e-azmat se nikal Qaid ban jae mohabbat to mohabbat se nikal Rah ka KHar hi kya gul bhi kuchalna hai tujhe UTh meri jaan mere sath hi chalna hai tujhe ToD ye azm-shikan daghdagha-e-pand bhi tod Teri KHatir hai jo zanjir wo saugand bhi tod Tauq ye bhi hai zamurrad ka gulu-band bhi tod ToD paimana-e-mardan-e-KHirad-mand bhi tod Ban ke tufan chhalakna hai ubalna hai tujhe UTh meri jaan mere sath hi chalna hai tujhe Tu falatun o arastu hai tu zahra parwin Tere qabze mein hai gardun teri Thokar mein zamin Han uTha jald uTha pa-e-muqaddar se jabin Main bhi rukne ka nahin waqt bhi rukne ka nahin LaDkhaDaegi kahan tak ki sambhalna hai tujhe UTh meri jaan mere sath hi chalna hai tujhe