beva ki khud kushii ye andherii raat ye saarii fazaa soii huii

Ye andheree raat ye saaree fazaa soee huee Pattee pattee manzar-e-khaamosh men khoee huee Maujzan hai bahr-e-zulmat teergee kaa josh hai Shaam hee se aaj qindeel-e-falak khaamosh hai Chand taare hain bhee to be-noor pathraa.e hue Jaise baasee haar men hon phuul kumhlaa.e hue Khap gaya hai yuun ghaTaa men chaandnee kaa saaf rang Jis tarah maayoosiyon men dab ke rah jaa.e umang UmDee hai kaalee ghaTaa dunya Dubone ke liye Yaa chalee hai baal khole raanD rone ke liye Jitnee hai gunjaan bastee utnee hee veeraan hai Har galee khaamosh hai har raasta sunsaan hai Ik makaan se bhee makeen kee kuch khabar miltee nahin Chilmanen uThtee nahin zanjeer-e-dar hiltee nahin So rahe hain mast-o-be-khud ghar ke kul peer-o-javaan Ho ga.ee hain band husn-o-ishq men sargoshiyaan Haan magar ik samt ik goshe men koi nauhagar Le rahi hai karvaTon par karvaTen dil thaam kar Dil sambhaltaa hee nahin hai seena-e-sad-chaak men Phuul saa chehra aTaa hai bevgee kee khaak men UD chalee hai rang-e-rukh ban kar hayaat-e-musta.aar Ho raha hai qalb-e-murda men javaanee kaa fishaar Hasraten dam toDtee hain yaas kee aaghosh men SaikDon shikve machalte hain lab-e-khaamosh men Umr aamaada nahin murda-parastee ke liye Baar hai ye zinda mayyat dosh-e-hastee ke liye Chaahtee hai laakh qaaboo dil pe paatee hee nahin Haa.e-re zaalim javaanee bas men aatee hee nahin Thartharaa kar girtee hai jab suune bistar par nazar Le ke ik karvaT paTak detee hai wo takiya pe sir Jab khanak uThtee hain sotee laDkiyon kee chooDiyaan Aah ban kar uThne lagtaa hai kaleja se dhuaan Ho ga.ee beva kee khaatir niind bhee jaise haraam Mukhtasar saa ahd-e-vaslat de gaya soz-e-davaam Dopahar kee Chaaon daur-e-shaadmaanee ho gaya Pyaas bhee bujhne na paa.ee khatm paanee ho gaya Le rahi hai karvaTon par karvaTen baa-iztiraar Aag men paara hai yaa bistar pe jism-e-be-qaraar PaD ga.ee ik aah kar ke ro ke uTh baiThee kabhi Ungliyon men le ke zulf-e-kham-ba-kham ainThee kabhi Aa ke honTon par kabhi maayoos aahen tham ga.iin Aur kabhi suunee kalaa.ee par nigaahen jam ga.iin Itnee dunya men kaheen apnee jagah paatee nahin Yaas is had kee ki shauhar kee bhee yaad aatee nahin Aa rahe hain yaad paiham saas nandon ke sulook PhaT raha hai gham se siina uTh rahi hai dil men huuk Apnee maan bahnon kaa bhee aankhen churaanaa yaad hai Aisee dunya men kisee kaa chhoD jaanaa yaad hai Baaghbaan to qabr men hai kaun ab dekhe bahaar Khud usee ko tiir us ke karne vaale hain shikaar Jab nazar aataa nahin deta koi bekas kaa saath Zahr kee sheeshee kee jaanib khud-ba-khud baDhtaa hai haath Dil taDap kar kah raha hai jald is dunya ko chhoD ChooDiyaan toDeen to phir zanjeer-e-hastee ko bhee tod Dam agar niklaa to khoee zindagee mil jaa.egee Ye nahin to khair tanhaa qabr hee mil jaa.egee Vaan tujhe zillat kee nazron se na dekhegaa koi Chaahe hansnaa chaahe ronaa phir na rokegaa koi Vaan sab ahl-e-dard hain sab saahab-e-insaaf hain Rahbar aage jaa chukaa raahen bhee teree saaf hain Dil inheen baaton men uljhaa tha ki dam ghabraa gaya Haath le kar zahr kee sheeshee labon tak aa gaya Tilmilaatee aankh jhapkaatee jhijaktee haanptee Pee ga.ee kul zahr aakhir thartharaatee kaanptee Maut ne jhaTkaa diyaa kul uzv Dheele ho ga.e Saans ukhDee, nabz Doobee, honT niile ho ga.e Aankh jhapkee ashk Tapkaa hichkee aa.ee kho ga.ee Maut kee aaghosh men ik aah bhar kar so ga.ee Aur kar ik aah sulge hind kee rasmon kaa daam Ai javaanaa-marg beva tujh pe 'kaifee' kaa salaam Ye andheri raat ye sari faza soi hui Patti patti manzar-e-KHamosh mein khoi hui Maujzan hai bahr-e-zulmat tirgi ka josh hai Sham hi se aaj qindil-e-falak KHamosh hai Chand tare hain bhi to be-nur pathrae hue Jaise basi haar mein hon phul kumhlae hue Khap gaya hai yun ghaTa mein chandni ka saf rang Jis tarah mayusiyon mein dab ke rah jae umang UmDi hai kali ghaTa duniya Dubone ke liye Ya chali hai baal khole ranD rone ke liye Jitni hai gunjaan basti utni hi viran hai Har gali KHamosh hai har rasta sunsan hai Ek makan se bhi makin ki kuch KHabar milti nahin Chilmanen uThti nahin zanjir-e-dar hilti nahin So rahe hain mast-o-be-KHud ghar ke kul pir-o-jawan Ho gai hain band husn-o-ishq mein sargoshiyan Han magar ek samt ek goshe mein koi nauhagar Le rahi hai karwaTon par karwaTen dil tham kar Dil sambhalta hi nahin hai sina-e-sad-chaak mein Phul sa chehra aTa hai bewgi ki KHak mein UD chali hai rang-e-ruKH ban kar hayat-e-mustaar Ho raha hai qalb-e-murda mein jawani ka fishaar Hasraten dam toDti hain yas ki aaghosh mein SaikDon shikwe machalte hain lab-e-KHamosh mein Umr aamada nahin murda-parasti ke liye Bar hai ye zinda mayyat dosh-e-hasti ke liye Chahti hai lakh qabu dil pe pati hi nahin Hae-re zalim jawani bas mein aati hi nahin Tharthara kar girti hai jab sune bistar par nazar Le ke ek karwaT paTak deti hai wo takiya pe sir Jab khanak uThti hain soti laDkiyon ki chuDiyan Aah ban kar uThne lagta hai kaleja se dhuan Ho gai bewa ki KHatir nind bhi jaise haram MuKHtasar sa ahd-e-waslat de gaya soz-e-dawam Dopahar ki chhanw daur-e-shadmani ho gaya Pyas bhi bujhne na pai KHatm pani ho gaya Le rahi hai karwaTon par karwaTen ba-iztirar Aag mein para hai ya bistar pe jism-e-be-qarar PaD gai ek aah kar ke ro ke uTh baiThi kabhi Ungliyon mein le ke zulf-e-KHam-ba-KHam ainThi kabhi Aa ke honTon par kabhi mayus aahen tham gain Aur kabhi suni kalai par nigahen jam gain Itni duniya mein kahin apni jagah pati nahin Yas is had ki ki shauhar ki bhi yaad aati nahin Aa rahe hain yaad paiham sas nandon ke suluk PhaT raha hai gham se sina uTh rahi hai dil mein huk Apni man bahnon ka bhi aankhen churana yaad hai Aisi duniya mein kisi ka chhoD jaana yaad hai Baghban to qabr mein hai kaun ab dekhe bahaar KHud usi ko tir us ke karne wale hain shikar Jab nazar aata nahin deta koi bekas ka sath Zahr ki shishi ki jaanib KHud-ba-KHud baDhta hai hath Dil taDap kar kah raha hai jald is duniya ko chhoD ChuDiyan toDin to phir zanjir-e-hasti ko bhi tod Dam agar nikla to khoi zindagi mil jaegi Ye nahin to KHair tanha qabr hi mil jaegi Wan tujhe zillat ki nazron se na dekhega koi Chahe hansna chahe rona phir na rokega koi Wan sab ahl-e-dard hain sab sahab-e-insaf hain Rahbar aage ja chuka rahen bhi teri saf hain Dil inhin baaton mein uljha tha ki dam ghabra gaya Hath le kar zahr ki shishi labon tak aa gaya Tilmilati aankh jhapkati jhijakti hanpti Pi gai kul zahr aaKHir thartharaati kanpti Maut ne jhaTka diya kul uzw Dhile ho gae Sans ukhDi, nabz Dubi, honT nile ho gae Aankh jhapki ashk Tapka hichki aai kho gai Maut ki aaghosh mein ek aah bhar kar so gai Aur kar ek aah sulge hind ki rasmon ka dam Ai jawana-marg bewa tujh pe 'kaifi' ka salam