doshiiza maalan

Lo pau phaTee wo chhup ga.ee taaron kee anjuman Lo jaam-e-mahr se wo chhalakne lagee kiran Khichne lagaa nigaah men fitrat kaa baankpan Jalve zameen pe barse zameen ban ga.ee dulhan Goonje taraane sub.h kaa ik shor ho gaya Aalam mai-e-baqaa men sharaabor ho gaya Phoolee shafaq fazaa men hinaa tilmilaa ga.ee Ik mauj-e-rang kaanp ke aalam pe chhaa ga.ee Kul chaandnee simaT ke gulon men samaa ga.ee Zarre bane nujoom zameen jagmagaa ga.ee ChhoDaa sahar ne teergi-e-shab ko kaaT ke UDne lagee havaa men kiran os chaaT ke Machlee jabeen-e-sharq pe is tarah mauj-e-noor Lahraa ke tairne lagee aalam men barq-e-toor UDne lagee shameem chhalakne lagaa suroor Khilne lage shagoofe chahakne lage tuyoor Jhonke chale havaa ke shajar jhoomne lage Mastee men phuul kaanTon kaa munh choomne lage Tham tham ke zau-fishaan huaa zarron pe aaftaab ChhiDkaa havaa ne sabza-e-khvaabeeda par gulaab Murjhaa.ee pattiyon men machalne lagaa shabaab Larzish huee gulon ko barasne lagee sharaab Rindaan-e-mast aur bhee sarmast ho ga.e Tharraa ke honT jaam men paivast ho ga.e Dosheeza ek khush-qad o khush-rang-o-khoob-roo Maalan kee noor-deeda gulistaan kee aabroo Mahkaa rahi hai phoolon se daamaan-e-aarzoo Tiflee liye hai god men toofaan-e-rang-o-boo Rangeeniyon men khelee gulon men palee huee Nauras kalee men qaus-e-quzah hai Dhalee huee Mastee men rukh pe baal pareshaan kiye hue Baadal men sham-e-toor farozaan kiye hue Har samt naqsh-e-paa se charaaghaan kiye hue Aanchal ko baar-e-gul se gulistaan kiye hue Lahraa rahi hai baad-e-sahar paanv chuum ke Phirtee hai teetaree see ghazab jhuum jhuum ke Zulfon men taab-e-sumbul-e-pechaan liye hue Aariz men shokh rang-e-gulistaan liye hue Aankhon men rooh-e-baada-e-irfaan liye hue HonTon men aab-e-la.al-e-badakhshaan liye hue Fitrat ne tol tol ke chashm-e-qubool men Saaraa chaman nichoD diyaa ek phuul men Ai hoor-e-baagh itnee khudee se na kaam le UD kar shameem-e-gul kaheen aanchal na thaam le Kaliyon kaa le payaam sahar kaa salaam le 'kaifee' se husn-e-dost kaa taaza kalaam le Shaa.er kaa dil hai muft men kyuun dard-mand ho Ik gul idhar bhee nazm agar ye pasand ho Lo pau phaTi wo chhup gai taron ki anjuman Lo jam-e-mahr se wo chhalakne lagi kiran Khichne laga nigah mein fitrat ka bankpan Jalwe zamin pe barse zamin ban gai dulhan Gunje tarane subh ka ek shor ho gaya Aalam mai-e-baqa mein sharabor ho gaya Phuli shafaq faza mein hina tilmila gai Ek mauj-e-rang kanp ke aalam pe chha gai Kul chandni simaT ke gulon mein sama gai Zarre bane nujum zamin jagmaga gai ChhoDa sahar ne tirgi-e-shab ko kaT ke UDne lagi hawa mein kiran os chaT ke Machli jabin-e-sharq pe is tarah mauj-e-nur Lahra ke tairne lagi aalam mein barq-e-tur UDne lagi shamim chhalakne laga surur Khilne lage shagufe chahakne lage tuyur Jhonke chale hawa ke shajar jhumne lage Masti mein phul kanTon ka munh chumne lage Tham tham ke zau-fishan hua zarron pe aaftab ChhiDka hawa ne sabza-e-KHwabida par gulab Murjhai pattiyon mein machalne laga shabab Larzish hui gulon ko barasne lagi sharab Rindan-e-mast aur bhi sarmast ho gae Tharra ke honT jam mein paiwast ho gae Doshiza ek KHush-qad o KHush-rang-o-KHub-ru Malan ki nur-dida gulistan ki aabru Mahka rahi hai phulon se daman-e-arzu Tifli liye hai god mein tufan-e-rang-o-bu Ranginiyon mein kheli gulon mein pali hui Nauras kali mein qaus-e-quzah hai Dhali hui Masti mein ruKH pe baal pareshan kiye hue Baadal mein sham-e-tur farozan kiye hue Har samt naqsh-e-pa se charaghan kiye hue Aanchal ko bar-e-gul se gulistan kiye hue Lahra rahi hai baad-e-sahar panw chum ke Phirti hai titari si ghazab jhum jhum ke Zulfon mein tab-e-sumbul-e-pechan liye hue Aariz mein shoKH rang-e-gulistan liye hue Aankhon mein ruh-e-baada-e-irfan liye hue HonTon mein aab-e-lal-e-badaKHshan liye hue Fitrat ne tol tol ke chashm-e-qubul mein Sara chaman nichoD diya ek phul mein Ai hur-e-bagh itni KHudi se na kaam le UD kar shamim-e-gul kahin aanchal na tham le Kaliyon ka le payam sahar ka salam le 'kaifi' se husn-e-dost ka taza kalam le Shaer ka dil hai muft mein kyun dard-mand ho Ek gul idhar bhi nazm agar ye pasand ho