kisaan

Chiir ke saal men do baar zameen kaa siina Dafn ho jaataa hoon Gudgudaate hain jo suraj ke sunahre naakhun Phir nikal aataa hoon Ab nikaltaa hoon to itnaa ki baTore jo koi daaman men Daaman phaT jaa.e Ghar ke jis kone men le jaa ke koi rakh de mujhe Bhuuk vahaan se haT jaa.e Phir mujhe peeste hain, goondhte hain, senkte hain Goondhne senkne men shakl badal jaatee hai Aur ho jaatee hai mushkil pahchaan Phir bhee rahtaa hoon kisaan Vahee khasta, bad-haal Qarz ke panja-e-khooneen men niDhaal Is daraantee ke tufail Kuchh hai maazee se ghaneemat miraa haal Haal se hogaa haseen istiqbaal UThte suraj ko zaraa dekho to Ho gaya sara ufuq laaln-laal Chir ke sal mein do bar zamin ka sina Dafn ho jata hun Gudgudate hain jo suraj ke sunahre naKHun Phir nikal aata hun Ab nikalta hun to itna ki baTore jo koi daman mein Daman phaT jae Ghar ke jis kone mein le ja ke koi rakh de mujhe Bhuk wahan se haT jae Phir mujhe piste hain, gundhte hain, senkte hain Gundhne senkne mein shakl badal jati hai Aur ho jati hai mushkil pahchan Phir bhi rehta hun kisan Wahi KHasta, bad-haal Qarz ke panja-e-KHunin mein niDhaal Is daranti ke tufail Kuchh hai mazi se ghanimat mera haal Haal se hoga hasin istiqbaal UThte suraj ko zara dekho to Ho gaya sara ufuq laln-lal