nayaa husn

Kitnee rangeen hai fazaa kitnee haseen hai dunya Kitnaa sarshaar hai zauq-e-chaman-aaraa.ee aaj Is saleeqe se sajaa.ee ga.ee bazm-e-geetee Too bhee deevaar-e-ajantaa se utar aa.ee aaj Roo-numaa.ee kee ye saa.at ye tahee-dastee-e-shauq Na churaa saktaa hoon aankhen na milaa saktaa hoon Pyaar saughaat, wafa nazr, mohabbat tohfa Yahee daulat tire qadmon pe luTaa saktaa hoon Kab se takh.eel men larzaan tha ye naazuk paikar Kab se khawabon men machaltee thee javaanee teree Mere afsaane kaa unvaan banee jaatee hai Dhal ke saanche men haqeeqat ke kahaanee teree Marhale jhel ke nikhraa hai mazaaq-e-takhleeq Sa.ee-e-paiham ne diye hain ye khad-o-khaal tujhe Zindagee chaltee rahi kaanTon pe, angaaron par Jab milee itnee haseen, itnee subuk chaal tujhe Tere qaamat men hai insaan kee bulandee kaa vaqaar Dukhatar-e-shahr hai, tahzeeb kaa shahkaar hai too Ab na jhapkegee palak, ab na haTengee nazren Husn kaa mere liye aakhiree me.aar hai too Ye tiraa paikar-e-seemeen, ye gulaabee saaree Dast-e-mehnat ne shafaq ban ke uDhaa dee tujh ko Jis se mahroom hai fitrat kaa jamaal-e-rangeen Tarbiyat ne wo lataafat bhee sikhaa dee tujh ko Aagahee ne tiree baaton men khilaaeen kaliyaan Ilm ne shakkareen lahje men nichoDe angoor Dilrubaa.ee kaa ye andaaz kise aataa tha Too hai jis saans men nazdeek usee saans men duur Ye lataafat, ye nazaakat, ye hayaa, ye shokhee Sau diye julte hain umDee huee zulmat ke khilaaf Lab-e-shaadaab pe chhalkee huee gulnaar hansee Ik baghaavat hai ye aa.een-e-jaraahat ke khilaaf Hausle jaag uThe soz-e-yaqeen jaag uThaa Nigah-e-naaz ke be-naam ishaaron ko salaam Too jahaan rahtee hai us arz-e-haseen par sajda Jin men too miltee hai un raah-guzaaron ko salaam Aa qareeb aa ki ye juuDaa main pareshaan kar duun Tishna-kaamee ko ghaTaaon kaa payaam aa jaa.e Jis ke maathe se ubhartee hain hazaaron sub.hen Miree dunya men bhee aisi koi shaam aa jaa.e Kitni rangin hai faza kitni hasin hai duniya Kitna sarshaar hai zauq-e-chaman-arai aaj Is saliqe se sajai gai bazm-e-giti Tu bhi diwar-e-ajanta se utar aai aaj Ru-numai ki ye saat ye tahi-dasti-e-shauq Na chura sakta hun aankhen na mila sakta hun Pyar saughat, wafa nazr, mohabbat tohfa Yahi daulat tere qadmon pe luTa sakta hun Kab se taKHil mein larzan tha ye nazuk paikar Kab se KHwabon mein machalti thi jawani teri Mere afsane ka unwan bani jati hai Dhal ke sanche mein haqiqat ke kahani teri Marhale jhel ke nikhra hai mazaq-e-taKHliq Sai-e-paiham ne diye hain ye KHad-o-KHal tujhe Zindagi chalti rahi kanTon pe, angaron par Jab mili itni hasin, itni subuk chaal tujhe Tere qamat mein hai insan ki bulandi ka waqar DuKHatar-e-shahr hai, tahzib ka shahkar hai tu Ab na jhapkegi palak, ab na haTengi nazren Husn ka mere liye aaKHiri mear hai tu Ye tera paikar-e-simin, ye gulabi sari Dast-e-mehnat ne shafaq ban ke uDha di tujh ko Jis se mahrum hai fitrat ka jamal-e-rangin Tarbiyat ne wo latafat bhi sikha di tujh ko Aagahi ne teri baaton mein khilain kaliyan Ilm ne shakkarin lahje mein nichoDe angur Dilrubai ka ye andaz kise aata tha Tu hai jis sans mein nazdik usi sans mein dur Ye latafat, ye nazakat, ye haya, ye shoKHi Sau diye julte hain umDi hui zulmat ke KHilaf Lab-e-shadab pe chhalki hui gulnar hansi Ek baghawat hai ye aain-e-jarahat ke KHilaf Hausle jag uThe soz-e-yaqin jag uTha Nigah-e-naz ke be-nam ishaaron ko salam Tu jahan rahti hai us arz-e-hasin par sajda Jin mein tu milti hai un rah-guzaron ko salam Aa qarib aa ki ye juDa main pareshan kar dun Tishna-kaami ko ghaTaon ka payam aa jae Jis ke mathe se ubharti hain hazaron subhen Meri duniya mein bhi aisi koi sham aa jae