taaj mahal

Dost! main dekh chukaa taaj-mahal .....vaapas chal Marmareen marmareen phoolon se ubaltaa hiiraa Chaand kee aanch men dahke hue seemeen meenaar Zehn-e-shaa.er se ye kartaa huaa chashmak paiham Ek malika kaa ziyaa-posh o fazaa-taab mazaar Khud ba-khud phir ga.e nazron men ba-andaaz-e-savaal Vo jo raston pe paDe rahte hain laashon kee tarah Khushk ho kar jo simaT jaate hain be-ras a.asaab Dhuup men khopDiyaan bajtee hain taashon kee tarah Dost main dekh chukaa taaj-mahal .....vaapas chal Ye dhaDaktaa huaa gumbad men dil-e-shaahjahaan Ye dar-o-baam pe hanstaa huaa malika kaa shabaab Jagmagaataa hai har ik tah se mazaaq-e-tafreeq Aur taareekh uDhaatee hai mohabbat kee naqaab Chaandnee aur ye mahal aalam-e-hairat kee qasam Duudh kee nahr men jis tarah ubaal aa jaa.e Aise sayyaah kee nazron men khupe kya ye samaan Jis ko farhaad kee qismat kaa khayaal aa jaa.e Dost main dekh chukaa taaj-mahal .....vaapas chal Ye damaktee huee chaukhaT ye tilaa-posh kalas Inheen jalvon ne diyaa qabr-parastee ko rivaaj Maah o anjum bhee hue jaate hain majboor-e-sujood Vaah aaraam-gah-e-malika-e-ma.abood-mizaaj Deedanee qasr nahin deedanee taqseem hai ye Roo-e-hastee pe dhuaan qabr pe raqs-e-anvaar Phail jaa.e isee rauza kaa jo simTaa daaman Kitne jaan-daar janaazon ko bhee mil jaa.e mazaar Dost main dekh chukaa taaj-mahal .....vaapas chal Dost! main dekh chuka taj-mahal Wapas chal Marmarin marmarin phulon se ubalta hira Chand ki aanch mein dahke hue simin minar Zehn-e-shaer se ye karta hua chashmak paiham Ek malika ka ziya-posh o faza-tab mazar KHud ba-KHud phir gae nazron mein ba-andaz-e-sawal Wo jo raston pe paDe rahte hain lashon ki tarah KHushk ho kar jo simaT jate hain be-ras aasab Dhup mein khopDiyan bajti hain tashon ki tarah Dost main dekh chuka taj-mahal Wapas chal Ye dhaDakta hua gumbad mein dil-e-shahjahan Ye dar-o-baam pe hansta hua malika ka shabab Jagmagata hai har ek tah se mazaq-e-tafriq Aur tariKH uDhati hai mohabbat ki naqab Chandni aur ye mahal aalam-e-hairat ki qasam Dudh ki nahr mein jis tarah ubaal aa jae Aise sayyah ki nazron mein khupe kya ye saman Jis ko farhad ki qismat ka KHayal aa jae Dost main dekh chuka taj-mahal Wapas chal Ye damakti hui chaukhaT ye tila-posh kalas Inhin jalwon ne diya qabr-parasti ko riwaj Mah o anjum bhi hue jate hain majbur-e-sujud Wah aaram-gah-e-malika-e-mabud-mizaj Didani qasr nahin didani taqsim hai ye Ru-e-hasti pe dhuan qabr pe raqs-e-anwar Phail jae isi rauza ka jo simTa daman Kitne jaan-dar janazon ko bhi mil jae mazar Dost main dekh chuka taj-mahal Wapas chal