tasavvur ye kis tarah yaad aa rahii ho ye khvaab kaisaa dikhaa rahii ho

Ye kis tarah yaad aa rahi ho ye khvaab kaisaa dikhaa rahi ho Ki jaise sach-much nigaah ke saamne khaDee muskuraa rahi ho Ye jism-e-naazuk, ye narm baahen, haseen gardan, siDaul baazoo Shagufta chehra, salonee rangat, ghaneraa jooDaa, siyaah gesoo Nasheelee aankhen, raseelee chitvan, daraaz palken, maheen abroo Tamaam shokhee, tamaam bijlee, tamaam mastee, tamaam jaadoo Hazaaron jaadoo jagaa rahi ho Ye khvaab kaisaa dikhaa rahi ho Gulaabee lab, muskuraate aariz, jabeen kushaada, buland qaamat Nigaah men bijliyon kee jhil-mil, adaaon men shabnamee lataafat DhaDaktaa seena, mahaktee saansen, navaa men ras, ankhDiyon men amrit Hama halaavat, hama malaahat, hama tarannum, hama nazaakat Lachak lachak gungunaa rahi ho Ye khvaab kaisaa dikhaa rahi ho To kya mujhe tum jalaa hee logee gale se apne lagaa hee logee Jo phuul juuDe se gir paDaa hai taDap ke us ko uThaa hee logee BhaDakte sho.alon, kaDaktee bijlee se meraa khirman bachaa hee logee Ghaneree zulfon kee Chaaon men muskuraa ke mujh ko chhupaa hee logee Ki aaj tak aazmaa rahi ho Ye khvaab kaisaa dikhaa rahi ho Naheen mohabbat kee koi qeemat jo koi qeemat adaa karogee Vafaa kee fursat na degee dunya hazaar azm-e-wafa karogee Mujhe bahalne do ranj-o-gham se sahaare kab tak diyaa karogee Junoon ko itnaa na gudgudaao, pakaD luun daaman to kya karogee Qareeb baDhtee hee aa rahi ho Ye khvaab kaisaa dikhaa rahi ho Ye kis tarah yaad aa rahi ho ye KHwab kaisa dikha rahi ho Ki jaise sach-much nigah ke samne khaDi muskura rahi ho Ye jism-e-nazuk, ye narm bahen, hasin gardan, siDaul bazu Shagufta chehra, saloni rangat, ghanera juDa, siyah gesu Nashili aankhen, rasili chitwan, daraaz palken, mahin abru Tamam shoKHi, tamam bijli, tamam masti, tamam jadu Hazaron jadu jaga rahi ho Ye KHwab kaisa dikha rahi ho Gulabi lab, muskuraate aariz, jabin kushada, buland qamat Nigah mein bijliyon ki jhil-mil, adaon mein shabnami latafat DhaDakta sina, mahakti sansen, nawa mein ras, ankhDiyon mein amrit Hama halawat, hama malahat, hama tarannum, hama nazakat Lachak lachak gunguna rahi ho Ye KHwab kaisa dikha rahi ho To kya mujhe tum jala hi logi gale se apne laga hi logi Jo phul juDe se gir paDa hai taDap ke us ko uTha hi logi BhaDakte shoalon, kaDakti bijli se mera KHirman bacha hi logi Ghaneri zulfon ki chhanw mein muskura ke mujh ko chhupa hi logi Ki aaj tak aazma rahi ho Ye KHwab kaisa dikha rahi ho Nahin mohabbat ki koi qimat jo koi qimat ada karogi Wafa ki fursat na degi duniya hazar azm-e-wafa karogi Mujhe bahalne do ranj-o-gham se sahaare kab tak diya karogi Junun ko itna na gudgudao, pakaD lun daman to kya karogi Qarib baDhti hi aa rahi ho Ye KHwab kaisa dikha rahi ho