zindagii

Aaj andheraa miree nas nas men utar jaa.egaa Aankhen bujh jaa.engee bujh jaa.enge ehsaas o shu.oor Aur ye sadiyon se jaltaa saa sulagtaa saa vajood Is se pahle ki sahar maathe pe shabnam chhiDke Is se pahle ki miree beTee ke wo phuul se haath Garm rukhsaar ko ThanDak bakhshen Is se pahle ki mire beTe kaa mazboot badan Tan-e-maflooj men shaktee bhar de Is se pahle ki miree biivee ke honT Mere honTon kee tapish pee jaa.en Raakh ho jaa.egaa jalte jalte Aur phir raakh bikhar jaa.egee Zindagee kahne ko be-maaya sahee Gham kaa sarmaaya sahee Main ne is ke liye kya kya na kiyaa Kabhee aasaanee se ik saans bhee yamraaj ko apna na diyaa Aaj se pahle bahut pahle Isee aangan men Dhoop-bhare daaman men Main khaDaa tha mire talvon se dhuaan uThtaa tha Ek be-naam saa be-rang saa khauf Kachche ehsaas pe chhaayaa tha ki jal jaa.oongaa Main pighal jaa.oongaa Aur pighal kar miraa kamzor saa ''main'' Qatra qatra mire maathe se Tapak jaa.egaa Ro raha tha magar ashkon ke baghair Cheekhtaa tha magar awaaz na thee Maut lahraatee thee sau shaklon men Main ne har shakl ko ghabraa ke khuda maan liyaa KaaT ke rakh diye sandal ke pur-asraar darakht Aur patthar se nikaalaa sho.ala Aur raushan kiyaa apne se baDaa ek alaav Jaanvar zab.h kiye itne ki Khoon kee lahren Paanv se uTh ke kamar tak aa.iin Aur kamar se mire sar tak aa.iin Som-ras main ne piyaa Raat din raqs kiyaa Naachte naachte talve mire Khoon dene lage Mire a.azaa kee thakan Ban ga.ee kaanpte honTon pe bhajan HaDDiyaan meree chaTakhne lageen eendhan kee tarah Mantar honTon se Tapakne lage roghan kee tarah ''agnee maataa miree agnee maataa Sookhee lakDee ke ye bhaaree kunde Jo tiree bhenT ko le aayaa hoon Un ko sveekaar kar aur aise dhadhak Ki machalte sho.ale kheench len josh men Sooraj kee sunahree zulfen Aag men aag mile Jo amar kar de mujhe Aisaa koi raag mile'' Agnee maan se bhee na jiine kee sanad jab paa.ee Zindagee ke na.e imkaan ne lee Angdhaai Aur kaanon men kaheen duur se awaaz aa.ee Buddham sharaDam gachhamee Dhammam sharaDam gacchami Sangham sharaDam gacchami Chaar abroo kaa safaayaa kar ke Be-sile vastr se Dhaanpaa ye badan Ponchh ke patnee ke maathe se damaktee bindiyaa Sote bachchon ko binaa pyaar kiye Chal paDaa haath men kashkol liye Chaahtaa tha kaheen bhikshaa hee men jeevan mil jaa.e Jo kabhi band na ho dil ko wo dhaDkan mil jaa.e Mujh ko bhikshaa men magar zahr milaa HonT tharraane lage jaise kare koi gila Jhuk ke suulee se usee waqt kisee ne ye kahaa Tere ik gaal pe jis pal koi thappaD maare Doosraa gaal bhee aage kar de Teree dunya men bahut hinsaa hai Us ke siine men ahinsaa bhar de Ki ye jiine kaa tareeqa bhee hai andaaz bhee hai Teree awaaz bhee hai meree awaaz bhee hai Main uThaa jis ko ahinsaa kaa sabaq sikhlaane Mujh ko laTkaa diyaa suulee pe usee dunya ne Aa raha tha main ka.ee koochon se Thokar khaa kar Ek awaaz ne rokaa mujh ko Kisee meenaar se neeche aa kar Allaahu-akbar allaahu-akbar Huaa dil ko ye gumaan Ki ye pur-josh azaan Maut se degee amaan Phir to pahunchaa main jahaan Main ne dohraa.ee kuch aise ye azaan Guunj uThaa sara jahaan Allaahu-akbar allaahu-akbar Isee awaaz men ik aur bhee goonjaa elaan Kullo-man-alaihaa-faan Ik taraf Dhal gaya khursheed-e-jahaan-taab kaa sar Huaa faalij kaa asar PhaT ga.ee nas koi shiryaanon men Khoon jam saa gaya Ho gaya zakhmee dimaagh Aisaa lagtaa tha ki bujh jaa.egaa jaltaa hai jo sadiyon se charaagh Aaj andheraa miree nas nas men utar jaa.egaa Ye samundar jo baDee der se toofaanee tha Aisaa taDpaa ki mire kamre ke andar aayaa Aate aate wo mire vaaste amrit laayaa Aur lahraa ke kahaa Shiv ne ye bhejvaayaa hai lo piyo aur Aaj shiv ilm hai amrit hai amal Ab wo aasaan hai jo dushvaar tha kal Raat jo maut kaa paighaam liye aa.ee thee Biivee bachchon ne mire Us ko khiDkee se pare phenk diyaa Aur jo wo zahr kaa ik jaam liye aa.ee thee Us ne wo khud hee piyaa Sub.h utree jo samundar men nahaane ke liye Raat kee laash milee paanee men Aaj andhera meri nas nas mein utar jaega Aankhen bujh jaengi bujh jaenge ehsas o shuur Aur ye sadiyon se jalta sa sulagta sa wajud Is se pahle ki sahar mathe pe shabnam chhiDke Is se pahle ki meri beTi ke wo phul se hath Garm ruKHsar ko ThanDak baKHshen Is se pahle ki mere beTe ka mazbut badan Tan-e-mafluj mein shakti bhar de Is se pahle ki meri biwi ke honT Mere honTon ki tapish pi jaen Rakh ho jaega jalte jalte Aur phir rakh bikhar jaegi Zindagi kahne ko be-maya sahi Gham ka sarmaya sahi Main ne is ke liye kya kya na kiya Kabhi aasani se ek sans bhi yamraj ko apna na diya Aaj se pahle bahut pahle Isi aangan mein Dhup-bhare daman mein Main khaDa tha mere talwon se dhuan uThta tha Ek be-nam sa be-rang sa KHauf Kachche ehsas pe chhaya tha ki jal jaunga Main pighal jaunga Aur pighal kar mera kamzor sa main Qatra qatra mere mathe se Tapak jaega Ro raha tha magar ashkon ke baghair ChiKHta tha magar aawaz na thi Maut lahraati thi sau shaklon mein Main ne har shakl ko ghabra ke KHuda man liya KaT ke rakh diye sandal ke pur-asrar daraKHt Aur patthar se nikala shoala Aur raushan kiya apne se baDa ek alaw Jaanwar zabh kiye itne ki KHun ki lahren Panw se uTh ke kamar tak aain Aur kamar se mere sar tak aain Som-ras main ne piya Raat din raqs kiya Nachte nachte talwe mere KHun dene lage Mere aaza ki thakan Ban gai kanpte honTon pe bhajan HaDDiyan meri chaTaKHne lagin indhan ki tarah Mantar honTon se Tapakne lage roghan ki tarah Agni mata meri agni mata Sukhi lakDi ke ye bhaari kunde Jo teri bhenT ko le aaya hun Un ko swikar kar aur aise dhadhak Ki machalte shoale khinch len josh mein Suraj ki sunahri zulfen Aag mein aag mile Jo amar kar de mujhe Aisa koi rag mile Agni man se bhi na jine ki sanad jab pai Zindagi ke nae imkan ne li angDai Aur kanon mein kahin dur se aawaz aai Buddham sharaDam gachhami Dhammam sharaDam gacchami Sangham sharaDam gacchami Chaar abru ka safaya kar ke Be-sile wastr se Dhanpa ye badan Ponchh ke patni ke mathe se damakti bindiya Sote bachchon ko bina pyar kiye Chal paDa hath mein kashkol liye Chahta tha kahin bhiksha hi mein jiwan mil jae Jo kabhi band na ho dil ko wo dhaDkan mil jae Mujh ko bhiksha mein magar zahr mila HonT tharrane lage jaise kare koi gila Jhuk ke suli se usi waqt kisi ne ye kaha Tere ek gal pe jis pal koi thappaD mare Dusra gal bhi aage kar de Teri duniya mein bahut hinsa hai Us ke sine mein ahinsa bhar de Ki ye jine ka tariqa bhi hai andaz bhi hai Teri aawaz bhi hai meri aawaz bhi hai Main uTha jis ko ahinsa ka sabaq sikhlane Mujh ko laTka diya suli pe usi duniya ne Aa raha tha main kai kuchon se Thokar kha kar Ek aawaz ne roka mujh ko Kisi minar se niche aa kar Allahu-akbar allahu-akbar Hua dil ko ye guman Ki ye pur-josh azan Maut se degi aman Phir to pahuncha main jahan Main ne dohrai kuch aise ye azan Gunj uTha sara jahan Allahu-akbar allahu-akbar Isi aawaz mein ek aur bhi gunja elan Kullo-man-alaiha-fan Ek taraf Dhal gaya KHurshid-e-jahan-tab ka sar Hua falij ka asar PhaT gai nas koi shiryanon mein KHun jam sa gaya Ho gaya zaKHmi dimagh Aisa lagta tha ki bujh jaega jalta hai jo sadiyon se charagh Aaj andhera meri nas nas mein utar jaega Ye samundar jo baDi der se tufani tha Aisa taDpa ki mere kamre ke andar aaya Aate aate wo mere waste amrit laya Aur lahra ke kaha Shiw ne ye bhejwaya hai lo piyo aur Aaj shiw ilm hai amrit hai amal Ab wo aasan hai jo dushwar tha kal Raat jo maut ka paigham liye aai thi Biwi bachchon ne mere Us ko khiDki se pare phenk diya Aur jo wo zahr ka ek jam liye aai thi Us ne wo KHud hi piya Subh utri jo samundar mein nahane ke liye Raat ki lash mili pani mein