ai naaseho na aur koi guftuguu karo
— Khalilur Rahman Azmi
Ai naaseho na aur koee guftugoo karo
Gar ho sake to chaak-e-garebaan rafoo karo
Hotee naheen hai yoonhee adaa ye namaaz-e-ishq
Yaan shart hai ki apne lahoo se vuzoo karo
Phir jis tarah bhee chaaho karo ham pe tabsira
Pahle hamaaree tarah se jiine kee khoo karo
Phir koee le gaya hai charaaghon kee raushnee
Taa-sub.h aaj apne jigar ko lahoo karo
Wo to naheen ye us kaa hee ham-shakl hai koee
Ab us kee chal ke aur kaheen justujoo karo
Aaj us haseen se mil ke ajab kaifiyat men hoon
Koee raqeeb ho to mire roo-ba-roo karo