bas ki paabandi e aaiin e wafa ham se huii

Bas ki paabandi-e-aa.een-e-wafa ham se huee Ye agar koee khataa hai to khataa ham se huee Zindagee tere liye sab ko khafaa ham ne kiyaa Apnee qismat hai ki ab too bhee khafaa ham se huee Raat bhar chain se sone naheen detee ham ko Itnee maayoos tiree zulf-e-rasaa ham se huee Sar uThaane kaa bhalaa aur kise yaaraa thaa Bas tire shahr men ye rasm adaa ham se huee Baar-haa dast-e-sitam-gar ko qalam ham ne kiyaa Baar-haa chaak andhere kee qabaa ham se huee Ham ne utne hee sar-e-raah jalaa.e hain charaag Jitnee bargashta zamaane kee havaa ham se huee Baar-e-hastee to uThaa uTh na sakaa dast-e-savaal Marte marte na kabhee koee duaa ham se huee Kuch dinon saath lagee thee hamen tanhaa paa kar Kitnee sharminda magar mauj-e-balaa ham se huee