galii galii ki thokar khaaii kab se khvaar o pareshaan hain

Galee galee kee Thokar khaa.ee kab se khvaar o pareshaan hain Yaan apna hee hosh nahin hai kis ko chaah ke armaan hain Fursat ho to aa ke dekho ham aavaara-gardon ko Kitne ghubaar hain is daaman men kitne dil men toofaan hain Sab hee un kaa adab karte hain chaahne vaalaa koi nahin Tokaa ik gustaakh ko lekin ab wo khud hee pashemaan hain Sar jo jhukaa us shokh ke aage aur kaheen phir jhuk na sakaa Maslak-e-mehr-o-wafa men vaa.iz ham kaafir bhee musalmaan hain Kuch ko mudaavaa karnaa hogaa is aashufta-mizaajee kaa Ai gham-e-jaanaan! apne paraa.e sab hee tujh se naalaan hain Vaadee o sahraa chhoD ke jab se tere shahr men aan base Jangal jangal DhoonDte phirte ham ko saare ghazaalaan hain Ahl-e-zamaana ko bas meree ik rusvaa.ee yaad rahee Varna meree wafa ke jaane kitne aur bhee unvaan hain Ham ne apnee or se khoobaan kab tum ko bad-naam kiyaa Tum ne jo jo daagh diye hain wo chhaatee pe numaayaan hain Khair se ab ke ahl-e-sitam ko deevaanon se kaam paDaa Dekhen kitnee zanjeeren hain dekhen kitne zindaan hain Jo paamaal-e-khizaan hain ik din khaak-e-chaman se uTThenge Un kaa hashr na jaane kya ho jo maqtool-e-bahaaraan hain Dar na raha mauj-e-balaa kaa rukh bhee phiraa Dunya kee havaa kaa Ronaa kya hai dukh saagar kaa us ke ham par ehsaan hain Ik ik buund jalee hai lahoo kee tab jaa kar ye raat kaTee Tere liye ai sub.h-e-tarab ham kab se chaak-garebaan hain 'meer' kaa tarz apnaayaa sab ne lekin ye andaaz kahaan 'aazmee'-saahib aap kee ghazlen sun sun kar sab hairaan hain