hai ajiib chiiz ma e junoon kabhi dil ki pyaas nahin bujhii

Hai 'ajeeb chiiz ma-e-junoon kabhi dil kee pyaas nahin bujhee Magar ab milaa ke to dekh luun zaraa ek qatra-e-aagahee Miree khaamushee miree be-hisee yahee meraa raaz-e-fasurdagee Kabhi so gaya hoon to jaag uThee hai ye dil kee choT dabee dabee Hai ye kaisee sohbat mai-kashaan ki har ek jaam lahoo lahoo Yahee dostee hai to ai khuda mujhe raas aa.e na dostee Hai malool mujh se duaa-e-maut ki saath us kaa na de sakaa Mire raaste men jo aa ga.ee yahee zindagee yahee zindagee Zaraa aa ke saamne baith jaa miree chashm-e-tar ke qareeb aa Mire aa.ine men bhee dekh le kabhi apnee zulf kee barhamee Yahee saath saath mire raha main isee kaa paa na sakaa pataa Kabhi har qadam pe mujhe milaa yahee aadmee yahee aadmee Mire saath saath chale the sab miraa saath koi na de sakaa Mire ham-safar mire ham-nazar miree khud-saree miree sar-kashee Miree samt aur bhee saaqiyaa wo jo buund buund men zahr thaa Jise aur koi na pee sakaa wo sharaab mere hee munh lagee Main shaheed-e-zulmat-e-shab sahee miree khaak ko yahee justujoo Koi raushnee koi raushnee koi raushnee koi raushnee