jaltaa nahin aur jal raha hoon

Jaltaa nahin aur jal raha hoon Kis aag men main pighal raha hoon Maflooj hain haath paanv mere Phir zehn men kyuun ye chal raha hoon Ik buund nahin lahoo kee baaqee Kis baat pe main machal raha hoon Tum jhuuT ye kah rahe ho mujh se Main bhee kabhi be-badal raha hoon Kyuun mujh se hue gunaah sarzad Kahne ko to be-'amal raha hoon Raa.ee kaa banaa ke ek parbat Ab us pe yoonhee phisal raha hoon Kis haath se haath main milaa.oon Ab apne hee haath mal raha hoon Kyuun aa.eena baar baar dekhoon Main aaj nahin jo kal raha hoon Ab kaun saa dar raha hai baaqee Is dar se main kyuun nikal raha hoon Qadmon ke tale to Kuch nahin hai Kis chiiz ko main kuchal raha hoon Ab koi nahin raha sahaaraa Main aaj phir se sanbhal raha hoon Main kyuun karoon aasmaan kee khwaish Ab tak to zameen pe chal raha hoon Ye barf haTaao mere sar se Main aaj Kuch aur jal raha hoon Mujh ko na pilaao koi paanee Pyaason ke main saath chal raha hoon Khaane kee nahin rahee talab Kuch Ab bhuuk ke bal pe pal raha hoon