koi tum jaisaa thaa aisa hi koi chehraa thaa
— Khalilur Rahman Azmi
Koee tum jaisaa thaa aisa hee koee chehraa thaa
Yaad aataa hai ki ik khvaab kabhee dekhaa thaa
Raat jab der talak chaand naheen niklaa thaa
Meree hee tarah se saaya bhee miraa tanhaa thaa
Jaane kya soch ke tum ne miraa dil pher diyaa
Mere pyaare isee miTTee men miraa sonaa thaa
Wo bhee kam-bakht zamaane kee havaa le ke ga.ee
Meree aankhon men miree mai kaa jo ik qatra thaa
Too na jaagaa magar ai dil tire darvaaze par
Aisa lagtaa hai koee pichhle pahar aayaa thaa
Teree deevaar kaa saaya na khafaa ho mujh se
Raah chalte yoonhee Kuch der ko aa baiThaa thaa
Ai shab-e-gham mujhe khawabon men sahee dikhlaa de
Meraa sooraj tiree vaadee men kaheen Duubaa thaa
Ik miree aankh hee shabnam se sharaabor rahee
Sub.h ko varna har ik phuul kaa munh sookhaa thaa
Tum zaraa thaam lo aa kar kabhee paimaana-e-jaan
Dekho dekho mire haathon se abhee chhooTaa thaa