kya qayaamat hai ki ham khud hi kahen khud hi sunen

Kya qayaamat hai ki ham khud hee kahen khud hee sunen Ek se ek abu-jehl hai kis kis se laDen Aur to koi bataataa nahin is shahr kaa haal Ishtihaaraat hee deevaar ke paDh kar dekhen Yaan to sab log hain dastaar-e-fazeelat baandhe Koi ham saa jo ho mahfil men to ham bhee baiThen Jitne saathee the wo is bhiiD men sab kho.e ga.e Ab to sab ek se lagte hain kise ham DhoonDhen Ghar kee veeraanee talab kartee hai din bhar kaa hisaab Ham ko ye fikr zaraa shaam ko baahar niklen Khvaab dekhe nahin khawabon kee tamanna kee hai Raat kis tarh se kaaTee hai ye kya 'arz karen Haasil-e-'umr bas ik kaasa-e-khaalee kyon ho Aur Kuch bas na chale zahr se is ko bhar len Ham se kyon poochhte hain vaqt kee raftaar kaa haal Aap kyon khud hee na masnad se utar kar dekhen Dil pe ik bojh saa rakkhaa hai kisee taur haTe Varaq-e-saada mayassar ho to ham bhee likkhen