mere aangan ko mahkaa do
— Khalilur Rahman Azmi
Mere aangan ko mahkaa do
Phir jee chaahe mujh ko bhulaa do
O raste ke chalte raahee
Main bhee chaloongaa mujh ko du'aa do
O jee ko le jaane vaalo
Phir mujh ko jiine kee sazaa do
Meree dhartee bahut hai pyaasee
Baadal ban kar ras barsaa do
Soyaa soyaa saa lagtaa hai
Mujh ko chheDo mujh ko jagaa do
Mujh ko niind nahin aatee hai
Apnee chaadar mujhe uDhaa do
ChhoTee sohbaten lambee shaamen
Aao in kaa farq miTaa do
Mere sangee mere saathee
Duur paDe hain un se milaa do