nashsha e mai ke sivaa kitne nashe aur bhi hain

Nashsha-e-mai ke sivaa kitne nashe aur bhee hain Kuch bahaane mire jiine ke liye aur bhee hain ThanDee ThanDee see magar gham se hai bharpoor havaa Ka.ee baadal miree aankhon se pare aur bhee hain Ishq-e-rusvaa tire har daagh-e-farozaan kee qasam Mere siine men ka.ee zakhm hare aur bhee hain Zindagee aaj talak jaise guzaaree hai na poochh Zindagee hai to abhee kitne maze aur bhee hain Hijr to hijr thaa ab dekhiye kya beetegee Us kee qurbat men ka.ee dard na.e aur bhee hain Raat to khair kisee tarah se kaT jaa.egee Raat ke ba.ad ka.ee kos kaDe aur bhee hain Gham-e-dauraan mire baazoo-e-shikasta se na khel Mashghale meree javaanee ke liye aur bhee hain Vaadee-e-gham men mujhe der tak awaaz na de Vaadee-e-gham ke sivaa mere patte aur bhee hain