piinaa nahin haraam hai zahr e wafa ki shart

Piinaa nahin haraam, hai zahr-e-wafa kee shart Aao uThaa den aaj mai-e-jaan-fazaa kee shart Shoreedgi-e-sar ke liye sang-e-dar kee qaid Zanjeer-e-gham ke vaaste zulf-e-dotaa kee shart Ho dopahar kee dhoop to palkon ke saa.ebaan Raaten guzaarnee hon to kaalee balaa kee shart Ye kya zaroor ho mizha-e-ishq khoon-fishaan Kyuun dast-e-naaz ke liye rang-e-hinaa kee shart Har dil-figaar ke liye kyuun chaak-e-pairahan Har dil-navaaz ke liye band-e-qabaa kee shart Kya farz hai ki ham bhee banen qais-e-aamiree Raah-e-junoon men kyuun ho kisee naqsh-e-paa kee shart Kyuun dil ke toDne ko kahen rasm-e-dilbaree Kyuun ho kisee se waada-e-sabr-aazmaa kee shart Kyuun ho kisee ko koocha-e-qaatil kee justujoo Kyuun imtihaan ke vaaste tegh-e-jafaa kee shart Kyuun zindagee ko jabr-e-musalsal kaa naam den Kyuun aarzoo-e-maut ko dast-e-duaa kee shart Kyuun har ghaDee zabaan pe ho jurm-o-sazaa kaa zikr Kyuun har amal kee fikr men khauf-e-khuda kee shart Ham ne khud apne-aap zamaane kee sair kee Ham ne qubool kee na kisee rahnumaa kee shart