rukh pe gard e malaal thii kya thii

Rukh pe gard-e-malaal thee kya thee Haasil-e-maah-o-saal thee kya thee Ek soorat see yaad hai ab bhee Aap apnee misaal thee kya thee Meree jaanib uThee thee koi nigah Ek mub.ham savaal thee kya thee Us ko paa kar bhee us ko paa na sakaa Justujoo-e-jamaal thee kya thee Sub.h tak khud se ham-kalaam raha Ye shab-e-jazb-o-haal thee kya thee Dil men thee par labon tak aa na sakee Aarzoo-e-visaal thee kya thee Apne zakhmon pe ik fasurda hansee Koshish-e-indimaal thee kya thee Umar bhar men bas ek baar aa.ee Saa.at-e-laa-zavaal thee kya thee Khoon kee pyaasee thee sar-zameen-e-vatan Ek shahr-e-khayaal thee kya thee Baa.is-e-ranjish-e-azeezaan thee Khoo-e-kasb-e-kamaal thee kya thee Ik jhalak lamha-e-faraaghat thee Ek amr-e-muhaal thee kya thee Koi khvaahaan na thaa ki jins-e-hunar Ek muflis kaa maal thee kya thee