tuu bhi ab chhod de saath ai gam e Dunya meraa
— Khalilur Rahman Azmi
Too bhee ab chhoD de saath ai gham-e-Dunya meraa
Meree bastee men naheen koee shanaasaa meraa
Shab-e-gham paar lagaa de ye safeenaa meraa
Sub.h hogee to utar jaa.egaa Dariya meraa
Mujh ko maaloom naheen naam hai ab kya meraa
DhoonDne vaale mujhe chhoD de peechhaa meraa
Main ne dekhee naheen barson se khud apnee soorat
Mere aa.eene se rooThaa hai saraapaa meraa
Too bhee khawabon men milee main bhee dhundlakon men tujhe
Zindagee dekh kabhee ghaur se chehraa meraa
Ghar se niklaa hoon to ab duur kaheen jaane de
Rok ai gardish-e-ayyaam na rastaa meraa
Do qadam dauD ke awaaz-e-jaras baith ga.ee
Chal paDaa main to kaheen paanv na Thahraa meraa
Mere daaman men rahee khaak-e-ghareeb-ul-vatanee
Rah gaya dekh ke munh daaman-e-sahraa meraa