aisa nahin ki un se mohabbat nahin rahii

Aisa naheen ki un se mohabbat naheen rahee Jazbaat men wo pahlee see shiddat naheen rahee Zof-e-quvaa ne aamad-e-peeree kee dee naved Wo dil naheen raha wo tabee.at naheen rahee Sar men wo intizaar kaa sauda naheen raha Dil par wo dhaDkanon kee hukoomat naheen rahee Kamzoree-e-nigaah ne sanjeeda kar diyaa Jalvon se chheD-chhaaD kee aadat naheen rahee Haathon se intiqaam liyaa irti.aash ne Daamaan-e-yaar se koee nisbat naheen rahee Paiham tavaaf-e-koocha-e-jaanaan ke din ga.e Pairon men chalne phirne kee taaqat naheen rahee Chehre ko jhurriyon ne bhayaanak banaa diyaa Aa.eena dekhne kee bhee himmat naheen rahee Allaah jaane maut kahaan mar ga.ee 'khumaar' Ab mujh ko zindagee kee zaroorat naheen rahee