akele hain wo aur jhunjhlaa rahe hain
— Khumar Barabankavi
Akele hain wo aur jhunjhlaa rahe hain
Miree yaad se jang farmaa rahe hain
Ye kaisee havaa-e-taraqqee chalee hai
Diye to diye dil bujhe jaa rahe hain
Ilaahee mire dost hon khairiyat se
Ye kyuun ghar men patthar nahin aa rahe hain
Bahisht-e-tasavvur ke jalve hain main hoon
Judaa.ee salaamat maze aa rahe hain
Qayaamat ke aane men rindon ko shak tha
Jo dekhaa to vaa.iz chale aa rahe hain
Bahaaron men bhee mai se parhez tauba
'khumaar' aap kaafir hue jaa rahe hain