hansne vaale ab ek kaam karen
— Khumar Barabankavi
Hansne vaale ab ek kaam karen
Jashn-e-girya kaa ehtimaam karen
Ham bhee kar len jo raushnee ghar men
Phir andhere kahaan qayaam karen
Mujh ko mahroomee-e-nazaara qubool
Aap jalve na apne aam karen
Ik guzaarish hai hazrat-e-naaseh
Aap ab aur koi kaam karen
Aa chalen us ke dar pe ab ai dil
Zindagee kaa safar tamaam karen
Haath uThtaa nahin hai dil se 'khumaar'
Ham unhen kis tarah salaam karen