ik pal men ik sadii kaa mazaa ham se puuchhiye

Ik pal men ik sadee kaa mazaa ham se poochhiye Do din kee zindagee kaa mazaa ham se poochhiye Bhoole hain rafta rafta unhen muddaton men ham Qiston men khud-kushee kaa mazaa ham se poochhiye Aaghaaz-e-aashiqee kaa mazaa aap jaaniye Anjaam-e-aashiqee kaa mazaa ham se poochhiye Jalte diyon men jalte gharon jaisee zau kahaan Sarkaar raushnee kaa mazaa ham se poochhiye Wo jaan hee ga.e ki hamen un se pyaar hai Aankhon kee mukhbiree kaa mazaa ham se poochhiye Hansne kaa shauq ham ko bhee thaa aap kee tarah Hansiye magar hansee kaa mazaa ham se poochhiye Ham tauba kar ke mar ga.e be-maut ai 'khumaar' Tauheen-e-mai-kashee kaa mazaa ham se poochhiye