jhunjhlaae hain lajaae hain phir muskuraae hain

Jhunjhlaa.e hain lajaa.e hain phir muskuraa.e hain Kis ehtimaam se unhen ham yaad aa.e hain Dair-o-haram ke habs-kadon ke sataa.e hain Ham aaj mai-kade kee havaa khaane aa.e hain Ab jaa ke aah karne ke aadaab aa.e hain Dunya samajh rahee hai ki ham muskuraa.e hain Guzre hain mai-kade se jo tauba ke baa'd ham Kuch duur aadatan bhee qadam laDkhaDaa.e hain Ai josh-e-girya dekh na karnaa khajil mujhe Aankhen miree zaroor hain aansoo paraa.e hain Ai maut ai bahisht-e-sukoon aa khush-aamdeed Ham zindagee men pahle pahal muskuraa.e hain Jitnee bhee mai-kade men hai saaqee pilaa de aaj Ham tishna-kaam zohd ke sahraa se aa.e hain Insaan jeete-jee karen tauba khataaon se Majbooriyon ne kitne farishte banaa.e hain Samjhaate qabl-e-ishq to mumkin thaa bantee baat Naaseh ghareeb ab hamen samjhaane aa.e hain Ka.abe men khairiyat to hai sab hazrat-e-'khumaar' Ye dair hai janaab yahaan kaise aa.e hain