kabhi sher o nagma ban ke kabhi aansuon men dhal ke
— Khumar Barabankavi
Kabhee sher-o-naghma ban ke kabhee aansuon men Dhal ke
Wo mujhe mile to lekin mile sooraten badal ke
Ye wafa kee sakht raahen ye tumhaare paa-e-naazuk
Na lo intiqaam mujh se mire saath saath chal ke
Vahee aankh be-bahaa hai jo gham-e-jahaan men Duube
Vahee jaam jaam-e-jam hai jo baghair farq chhalke
Na to hosh se ta.aaruf na junoon se aashnaa.ee
Ye kahaan pahunch ga.e ham tiree bazm se nikal ke
Ye charaagh-e-anjuman to hain bas ek shab ke mehmaan
Too jalaa wo sham.a ai dil jo bujhe kabhee na jal ke
Koee ai 'khumaar' un ko mire sher nazr kar de
Jo mukhaalifeen mukhlis naheen mo'tarif ghazal ke