kya huaa husn hai ham safar yaa nahin
— Khumar Barabankavi
Kya huaa husn hai ham-safar yaa naheen
Ishq manzil hee manzil hai rasta naheen
Do parinde uDe aankh nam ho ga.ee
Aaj samjhaa ki main tujh ko bhoolaa naheen
Tark-e-mai ko abhee din hee kitne hue
Kuch kahaa mai ko zaahid to achchhaa naheen
Har nazar meree ban jaatee zanjeer-e-paa
Us ne jaate hue muD ke dekhaa naheen
ChhoD bhee de miraa saath ai zindagee
Mujh ko tujh se nadaamat hai shikva naheen
Too ne tauba to kar lee magar ai 'khumaar'
Tujh ko rahmat pe shaayad bharosa naheen