mujh ko shikast e dil kaa mazaa yaad aa gaya
— Khumar Barabankavi
Mujh ko shikast-e-dil kaa mazaa yaad aa gaya
Tum kyuun udaas ho ga.e kya yaad aa gaya
Kahne ko zindagee thee bahut mukhtasar magar
Kuch yuun basar huee ki khuda yaad aa gaya
Vaa.iz salaam le ki chalaa mai-kade ko main
Firdaus-e-gum-shuda kaa pataa yaad aa gaya
Barse baghair hee jo ghaTaa ghir ke khul ga.ee
Ik bevafaa kaa ahd-e-wafa yaad aa gaya
Maangenge ab duaa ki use bhuul jaa.en ham
Lekin jo wo ba-vaqt-e-duaa yaad aa gaya
Hairat hai tum ko dekh ke masjid men ai 'khumaar'
Kya baat ho ga.ee jo khuda yaad aa gaya