pii pii ke jagmagaae zamaane guzar gae

Pee pee ke jagmagaa.e zamaane guzar ga.e Raaton ko din banaa.e zamaane guzar ga.e Jaan-e-bahaar phuul nahin aadmee hoon main Aa jaa ki muskuraa.e zamaane guzar ga.e Kya laa.iq-e-sitam bhee nahin ab main dosto Patthar bhee ghar men aa.e zamaane guzar ga.e O jaane vaale aa ki tire intizaar men Raste ko ghar banaa.e zamaane guzar ga.e Gham hai na ab khushee hai na ummeed hai na yaas Sab se najaat paa.e zamaane guzar ga.e Marne se wo Daren jo ba-qaid-e-hayaat hain Mujh ko to maut aa.e zamaane guzar ga.e Kya kya tavaqquaat thiin aahon se ai 'khumaar' Ye tiir bhee chalaa.e zamaane guzar ga.e