wo sivaa yaad aae bhulaane ke baad
— Khumar Barabankavi
Wo sivaa yaad aa.e bhulaane ke ba.ad
Zindagee baDh ga.ee zahr khaane ke ba.ad
Dil sulagtaa raha aashiyaane ke ba.ad
Aag ThanDee huee ik zamaane ke ba.ad
Raushnee ke liye dil jalaanaa paDaa
Aisee zulmat baDhee tere jaane ke ba.ad
Jab na Kuch ban paDaa arz-e-gham kaa javaab
Wo khafaa ho ga.e muskuraane ke ba.ad
Dushmanon se pashemaan honaa paDaa
Doston kaa khuloos aazmaane ke ba.ad
Ranj had se guzar ke khushee ban gaya
Ho ga.e paar ham Doob jaane ke ba.ad
Bakhsh de yaa rab ahl-e-havas ko bahisht
Mujh ko kya chaahiye tujh ko paane ke ba.ad
Kaise kaise gile yaad aa.e 'khumaar'
Un ke aane se qabl un ke jaane ke ba.ad