biimaar hain to ab dam e iisaa kahaan se aae

Beemaar hain to ab dam-e-eesaa kahaan se aa.e Is dil men dard-e-shauq-o-tamannaa kahaan se aa.e Bekaar sharh-e-lafz-o-ma.aanee se faa.eda Jab too naheen to shahr men tujh saa kahaan se aa.e Har chashm sang-e-kizb-o-adaavat se surkh hai Ab aadmee ko zindagee karnaa kahaan se aa.e Vahshat havas kee chaaT ga.ee khaak-e-jism ko Be-dar gharon men shakl kaa saaya kahaan se aa.e JaD se ukhaD ga.e to badaltee ruton se kya Be-aab aa.inon men saraapaa kahaan se aa.e Saayon pe e'timaad se uktaa gaya hai jee Toofaan men zindagee kaa bharosa kahaan se aa.e Gham ke thapeDe le ga.e naagan se lambe baal Raaton men jangalon kaa wo saaya kahaan se aa.e 'naaheed' faishanon ne chhupaa.e hain aib bhee Chashme na hon to aankh kaa parda kahaan se aa.e