diivaar o dar men gam kaa tamaasha to hai Abhi
— Kishwar Naheed
Deevaar-o-dar men gham kaa tamaasha to hai abhee
Wo khud naheen pa us kaa bulaavaa to hai abhee
Maanoos ho chalee hai udaasee se zindagee
Paanv ke aablon kaa nazaaraa to hai abhee
Sach hai ki zahr-e-ishq talattuf gurez thaa
Chingaariyon ne varna pukaaraa to hai abhee
Khawabon ko dar-ba-dar hee rakhaa thaa naseeb ne
Aashuftagee men jaan kaa khasaara to hai abhee
Ma.aloom hai ki Kuch bhee naheen dasht-e-zeest men
Ummeed-e-khvaab hee pe guzaaraa to hai abhee
Rukhsat shab-e-firaaq bahut sah liyaa tujhe
Hamraaz garche khvaab sitaaraa to hai abhee
Be-taabiyaan sameT ke poochhaa kare hai dil
Qismat men apnee sub.h kaa taaraa to hai abhee