dil ki diivaar men aaiina rakhaa thaa kis ne
— Kishwar Naheed
Dil kee deevaar men aa.eena rakhaa thaa kis ne
Mujh ko pahchaante rehne ko kahaa thaa kis ne
Dushman-e-jaan tire haathon men to patthar bhee na thaa
Lazzat-e-khvaab ko nam-deeda kiyaa thaa kis ne
Ab bahut duur nikal jaane ko jee chaahtaa hai
Mujh ko jaate hue deevaana kahaa thaa kis ne
Us kee aankhon men bulaavaa hee na thaa sach ye hai
Ai shab-e-hijr tujhe saath kiyaa thaa kis ne
Anjuman anjuman qisse the hamaare kal tak
Aaj veeraanee ko aankhon men rakhaa thaa kis ne
Naam to us kaa bhalaa saa thaa magar yaad naheen
Siskiyaan le ke tujhe yaad kiyaa thaa kis ne