harii thii shaakh to baithaa na us pe panchhii kyuun
— Kishwar Naheed
Haree thee shaakh to baiThaa na us pe panchi kyuun
Lage hai ujDe hue khvaab see ye bastee kyuun
Mujhe khabar hai mire ghar men saanp aankhen hain
Vagarna gham ke khazeene chhupaa ke rakhtee kyuun
Tumhee se tohmat-e-aalam ko nisbaten mausoom
Tumhen ko kahte hain sab log sab se achchhee kyuun
Khizaan ko mere hee khawabon ke naam kyuun likkhaa
Zameen ne apnee ye daulat mujhee ko saunpee kyuun
Miraa vajood bhee kya Kuch khuda se miltaa hai
Savaal-e-shak se hai begaana meree hastee kyuun
Ye ashk silsila-e-jaan ke bolte lab hain
Chhupaa ke daulat-e-naayaab tum ne rakkhee kyuun
Vajood apna kise kab aziiz thaa 'naaheed'
Huee hai shaam se pahle hee shaam gahree kyuun