khush bayaabaan men magar shahr men darnaa us kaa
— Kishwar Naheed
Khush bayaabaan men magar shahr men Darnaa us kaa
Kaasa haathon men liye ghar men bhee phirnaa us kaa
Dil dukhaa ke kabhee hansnaa kabhee ronaa us kaa
Mere aangan men likhaa thaa naheen basnaa us kaa
Us ne tanhaa.ee men bhee anjuman-aaraa.ee kee
Chaand ne dekh liyaa aankhon ko bharnaa us kaa
Main ne dekhaa hai sar-e-shaam udaasee kaa khiraam
Paanv men chhaale pahan ke na Thaharnaa us kaa
Aa.ina dekhnaa manzoor naheen thaa us ko
Lutf detaa thaa havaa ban ke guzarnaa us kaa
Har khalish aan ke ruktee thee miree baanhon men
Zindagee dekhtee rahtee thee taDapnaa us kaa
Hai ajab tarz-e-mulaaqaat ajab tarz-e-safar
Paas aa ke na Thaharnaa na guzarnaa us kaa