pahan ke pairhan e gul sabaa nikaltii hai
— Kishwar Naheed
Pahan ke pairahan-e-gul sabaa nikaltee hai
Siyaahiyon ke jigar se ziyaa nikaltee hai
Kabhee to mujh ko bhee ehsaas-e-aashnaa.ee de
Wo raushnee jo kaf-e-gul pe jaa nikaltee hai
Main aankh band karoon to bhee hai vahee manzar
Wo ek shakl har ik roo pe aa nikaltee hai
Saraab-e-fahm se aage kaheen hai bahr-e-muraad
Har ek manzil-e-dil naqsh-e-paa nikaltee hai
Kabhee jo khul ke karoon baat apne aap se main
Har ek aarzoo gham-aashnaa nikaltee hai
Hujoom-e-aks men chehra talaash kaise karen
Har ek shakl asaas-e-khalaa nikaltee hai
Sarak rahe hain andhere har ek bastee se
Azaab-e-abr se qurs-e-wafa nikaltee hai
Mire yaqeen kee ghuTan aur bhee baDhe 'naaheed'
Havaa ho band to mauj-e-balaa nikaltee hai