sulagtii ret pe aankhen bhi zer e paa rakhnaa

Sulagtee ret pe aankhen bhee zer-e-paa rakhnaa Naheen hai sahl havaa se muqaabla rakhnaa Use ye zom ki aaghosh-e-gul bhee us kee hai Jo chaahtaa hai parindon ko be-navaa rakhnaa Subuk na ho ye nigah-daari-e-junoon ham se Ye dekhne ko use saamne biThaa rakhnaa Bikhar na jaanaa jaraahat-navaazi-e-shab par Mashaam-e-jaan ko abhee khvaab aashnaa rakhnaa Wo fursaten ki jinhen aahaTon kee khvaahish ho Unhen jaras kee tamannaa se maa-sivaa rakhnaa Tamaam manzar-e-jaan us kee khvaahishon se banaa Wo khvaab hai to use khvaab men sajaa rakhnaa Udaasiyon ko to aangan hee chaahiye khaalee Chhaton pe chaandnee raaton kaa silsila rakhnaa Wo jab bhee aayaa bahut tez baarishon jaisaa Wo jis ne chaahaa mujhe surma.ee ghaTaa rakhnaa Bas ik charaagh masaafat kaa bojh sah legaa Sukhan ke biich talabgaari-e-wafa rakhnaa