tire qariib pahunchne ke dhang aate the
— Kishwar Naheed
Tire qareeb pahunchne ke Dhang aate the
Ye khud-fareb magar raah bhuul jaate the
Hamen aziiz hain in bastiyon kee deevaaren
Ki jin ke saa.e bhee deevaar bante jaate the
Sateez-e-naqsh-e-wafa thaa ta.alluq-e-yaaraan
Wo zakhma-e-rag-e-jaan chheD chheD jaate the
Wo aur kaun tire qurb ko tarastaa thaa
Fareb-khurda hee teraa fareb khaate the
Chhupaa ke rakh diyaa phir aagahee ke sheeshe ko
Is aa.eene men to chehre bigaDte jaate the
Ab ek umar se dukh bhee koee naheen detaa
Wo log kya the jo aaThon pahar rulaate the
Wo log kya hue jo oonghtee huee shab men
Dar-e-firaaq kee zanjeer see hilaate the