umr men us se badii thii lekin pahle Toot ke bikhrii main
— Kishwar Naheed
Umr men us se baDee thee lekin pahle Toot ke bikhree main
Saahil saahil jazbe the aur Dariya Dariya pahunchee main
Shahr men us ke naam ke jitne shakhs the sab hee achchhe the
Sub.h-e-safar to dhund bahut thee dhoopen ban kar niklee main
Us kee hathelee ke daaman men saare mausam simTe the
Us ke haath men jaagee main aur us ke haath se ujlee main
Ik muTThee taareekee men thaa ik muTThee se baDh kar pyaar
Lams ke jugnoo palloo baandhe ziina ziina utree main
Us ke aangan men khultaa thaa shahr-e-muraad kaa darvaaza
Kuen ke paas se khaalee gaagar haath men le kar palTee main
Main ne jo sochaa thaa yuun to us ne bhee vahee sochaa thaa
Din niklaa to wo bhee nahin thaa aur maujood nahin thee main
Lamha lamha jaan pighlegee qatra qatra shab hogee
Apne haath larazte dekhe apne-aap hee sambhalee main