aa nikal ke maidaan men do rukhii ke khaane se
— Majrooh Sultanpuri
Aa nikal ke maidaan men do-rukhee ke khaane se
Kaam chal nahin saktaa ab kisee bahaane se
Ahd-e-inqalaab aayaa daur-e-aaftaab aayaa
Muntazir thiin ye aankhen jis kee ik zamaane se
Ab zameen gaa.egee hal ke saaz par naghme
Vaadiyon men naachenge har taraf taraane se
Ahl-e-dil ugaa.enge khaak se mah o anjum
Ab guhar subuk hogaa jau ke ek daane se
Manchale bunenge ab rang-o-boo ke pairaahan
Ab sanvar ke niklegaa husn kaar-khaane se
Aam hogaa ab hamdam sab pe faiz fitrat kaa
Bhar sakenge ab daaman ham bhee is khazaane se
Main ki ek mehnat-kash main ki teergee-dushman
Sub.h-e-nau ibaarat hai mere muskuraane se
Khud-kushee hee raas aa.ee dekh bad-naseebon ko!
Khud se bhee gurezaan hain bhaag kar zamaane se
Ab junoon pe wo saa.at aa paDee ki ai 'majrooh'
Aaj zakhm-e-sar behtar dil pe choT khaane se