aah e jaan soz ki mahruumi e taasiir na dekh
— Majrooh Sultanpuri
Aah-e-jaan-soz kee mahroomi-e-taaseer na dekh
Ho hee jaa.egee koee jiine kee tadbeer na dekh
Haadse aur bhee guzre tiree ulfat ke sivaa
Haan mujhe dekh mujhe ab meree tasveer na dekh
Ye zaraa duur pe manzil ye ujaalaa ye sukoon
Khvaab ko dekh abhee khvaab kee taabeer na dekh
Dekh zindaan se pare rang-e-chaman josh-e-bahaar
Raqs karnaa hai to phir paanv kee zanjeer na dekh
Kuch bhee hoon phir bhee dukhe dil kee sadaa hoon naadaan
Meree baaton ko samajh talkhi-e-taqreer na dekh
Vahee 'majrooh' vahee shaa.ir-e-aavaara-mizaaj
Koee uTThaa hai tiree bazm se dil-geer na dekh