ab ahl e dard ye jiine kaa ehtimaam karen

Ab ahl-e-dard ye jiine kaa ehtimaam karen Use bhulaa ke gham-e-zindagee kaa naam karen Fareb khaa ke un aankhon kaa kab talak ai dil Sharaab-e-khaam piyen raqs-e-naa-tamaam karen Gham-e-hayaat ne aavaara kar diyaa varna Thee aarzoo ki tire dar pe sub.h o shaam karen Na maangoon baada-e-gul-goon se bhiik mastee kee Agar tire lab-e-laaleen miraa ye kaam karen Na dekhen dair o haram soo-e-rah-ravaan-e-hayaat Ye qaafile to na jaane kahaan qayaam karen Hain is kashaakash-e-paiham men zindagee ke maze Phir ek baar koi sa.i-e-naa-tamaam karen Sikhaa.en dast-e-talab ko adaa-e-bebaakee Payaam-e-zer-labee ko salaa-e-aam karen Ghulaam rah chuke toDen ye band-e-rusvaa.ee Kuch apne baazu-e-mehnat kaa ehtiraam karen Zameen ko mil ke sanvaaren misaal-e-roo-e-nigaar Rukh-e-nigaar se raushan charaagh-e-baam karen Phir uTh ke garm karen kaarobaar-e-zulf-o-junoon Phir apne saath use bhee aseer-e-daam karen Miree nigaah men hai arz-e-moscow 'majrooh' Wo sarzameen ki sitaare jise salaam karen