ahl e tuufaan aao dil vaalon kaa afsaana kahen

Ahl-e-toofaan aao dil-vaalon kaa afsaana kahen Mauj ko gesoo bhanvar ko chashm-e-jaanaana kahen Daar par chaDh kar lagaa.en naara-e-zulf-e-sanam Sab hamen baa-hosh samjhen chaahe deevaana kahen Yaar-e-nukta-daan kidhar hai phir chalen us ke huzoor Zindagee ko dil kahen aur dil ko nazraana kahen Thaamen us but kee kalaa.ee aur kahen is ko junoon Chuum len munh aur ise andaaz-e-rindaana kahen Surkhi-e-mai kam thee main ne chhoo liye saaqee ke honT Sar jhukaa hai jo bhee ab arbaab-e-mai-khaana kahen Tishnagee hee tishnagee hai kis ko kahiye mai-kada Lab hee lab ham ne to dekhe kis ko paimaana kahen Paara-e-dil hai vatan kee sarzameen mushkil ye hai Shahr ko veeraan yaa is dil ko veeraana kahen Ai rukh-e-zebaa bataa de aur abhee ham kab talak Teergee ko sham-e-tanhaa.ee ko parvaana kahen Aarzoo hee rah ga.ee 'majrooh' kahte ham kabhi Ik ghazal aisi jise tasveer-e-jaanaana kahen