hamen shuuur e junoon hai ki jis chaman men rahe

Hamen shu.oor-e-junoon hai ki jis chaman men rahe Nigaah ban ke haseenon kee anjuman men rahe Too ai bahaar-e-gurezaan kisee chaman men rahe Mire junoon kee mahak tere pairahan men rahe Mujhe nahin kisee usloob-e-shaa.iree kee talaash Tiree nigaah kaa jaadoo mire sukhan men rahe Na ham qafas men ruke misl-e-boo-e-gul sayyaad Na ham misaal-e-sabaa halqa-e-rasan men rahe Khule jo ham to kisee shokh kee nazar men khule Hue girah to kisee zulf kee shikan men rahe Sarishk rang na bakhshe to kyuun ho baar-e-mizha Lahoo hinaa nahin bantaa to kyuun badan men rahe Hujoom-e-dahr men badlee na ham se vaz-e-khiraam Giree kulaah ham apne hee baankpan men rahe Ye hukm hai rahe muTThee men band sail-e-naseem Ye zid hai bahr-e-tapaan kooza-e-kuhan men rahe Zabaan hamaaree na samjhaa yahaan koi 'majrooh' Ham ajnabee kee tarah apne hee vatan men rahe